اسلام آباد (این این آئی) وزیر مملکت پٹرولیم مصدق ملک نے کہا ہے کہ سبسڈی دینے کی حکومت طاقت ختم تو نہیں محدود ہوگئی ہے،سابق وزیر توانائی نے روس سے تیل خریداری کیلئے ایک خط ضرور لکھا تھا،روس کے ساتھ پاکستان کا تیل خریدنے کا کوئی معاہدہ نہیں۔

سینیٹ کی قائمہ کمیٹی برائے پٹرولیم کا اجلاس چیئرمین عبدالقادر کی زیر صدارت ہوا جس میں وزیر مملکت نے کہاکہ اس وقت درآمدی ایل این جی کی قیمت 22 سے 24 ڈالر فی ایم ایم بی ٹی یو ہے،سبسڈی دینے کی حکومتی طاقت ختم تو نہیں لیکن محدود ہو گئی ہے،کوشش ہوتی ہے کہ غریب آدمی پر مہنگائی کا کم سے کم بوجھ پڑے۔ سیکرٹری پٹرولیم نے بتایاکہ گیس کے شعبے کا گردشی قرضہ 15 سو ارب روپے ہے۔ چیئر مین کمیٹی نے کہاکہ پاور اور گیس سیکٹر کا گردشی قرضہ 4 ہزار ارب کے قریب پہنچ چکا ہے۔ چیئر مین کمیٹی سینیٹر عبد القادر نے کہاکہ ایسی صورتحال میں ملکی معیشت کیسے چلے گی۔ سینیٹر مصدق ملک نے کہاکہ حکومت پٹرول اور ڈیزل کی قیمتوں کو ریگولیٹ کرتی ہے،باقی جو ان سے اوپر کی مہنگی کوالٹی کا تیل ڈلوانا چائیے مرضی ہے،ایسے فیول کی قیمت بھی ڈی ریگولیٹ ہے۔ صدر مملکت نے کہاکہ روس کے ساتھ پاکستان کا تیل خریدنے کا کوئی معاہدہ نہیں،سابق وزیر توانائی نے روس سے تیل خریداری کیلئے ایک خط ضرور لکھا تھا۔ رخسانہ زبیری رکن کمیٹی نے کہاکہ ملک میں گھٹیا معیار کاپٹر ول فروخت ہو رہا ہے،گھٹیا تیل فروخت کی وجہ سے سانس کی بیماریاں بڑھ رہی ہیں۔ سیکرٹری پٹرولیم نے کہاکہ ایرانی سمگلڈتیل سستا ہوتا ہے،یہ سمگلنگ جرم ہے۔