اسلام آباد (مانیٹرنگ ڈیسک ،این این آئی)سابق وزیر اعظم عمران خان نے کہا ہے کہ کسی کے لیے نیوٹرل رہنے کی گنجائش نہیں،پشاور میں تحریک انصاف کے رہنمائوں کے ہمراہ پریس کانفرنس کے دوران عمران خان نے کہا کہ آج ملک میں فیصلہ کن وقت ہے، ہمیں ان 2 خاندانوں کی پوری تاریخ پتہ ہے۔
اپوزیشن میں ان کو جمہوریت یاد آجاتی ہے، ہماری حکومت میں یہ کئی بار سڑکوں پر نکلے، انہوں نے کئی بار مارچ کیے ہم نے کبھی ایسا نہیں کیا۔ آمر اور ان کی حکومت میں کوئی فرق نہیں، فاشسٹ حکومت نے ہمارے خلاف کارروائیاں شروع کر رکھی ہیں، آخر ایسا کیا ہورہا ہے جو یہ ہتھکنڈے استعمال کیے جارہے ہیں۔سابق وزیراعظم نے کہا کہ کسی کے لیے نیوٹرل رہنے کی گنجائش نہیں، جو ادارے خود کو نیوٹرل کہتے ہیں ان کو کہتا ہوں کہ انہیں پاکستان کی خودمختاری کا تحفظ کرنا ہے۔علاوہ ازیں پاکستان تحریک انصاف کے چیئرمین عمران خان نے کہا ہے کہ پی ٹی آئی کارکن اور قیادت کے گھروں پر چھاپوں سے (ن )لیگ کا چہرہ پھر عیاں ہوگیا۔سماجی رابطے کی سائٹ ٹوئٹر پر کیے گئے سلسلہ وار ٹوئٹس میں سابق وزیر اعظم عمران خان نے کہا کہ پرامن احتجاج تمام شہریوں کا حق ہے، ن لیگ جب بھی اقتدار میں آتی ہے اس کی یہ فاشست فطرت ظاہر ہوجاتی ہے۔انہوں نے کہا کہ ہم نے ن لیگ، پی پی پی اور جے یو آئی کے مارچ نہیں روکے اور نہ کریک ڈاون کیا تھا، گھروں پر کریک ڈاثون کٹھ پتلیوں کی ڈوریاں تھامنے والوں پر بھی سنجیدہ سوالات اٹھارہا ہے۔انہوں نے کہاکہ معیشت پہلے ہی تباہی کے گڑھے میں اتر چکی ہے، یہ غیر جمہوری اور سفاکانہ اقدامات معاشی صورتحال میں مزید ابتری کے موجب بنیں گے۔
