مریدکے ( این این آئی)وفاقی وزیر تعلیم رانا تنویر حسین کی رہائشگاہ کے باہر نو ماہ سے تنخواہوں سے محروم سرکاری سکولوں کے سیکڑوں اساتذہ نے احتجاجی مظاہرہ کیا ۔پنجاب کے مختلف اضلاع گوجرانوالہ سیالکوٹ راجن پور رحیم یار خان ڈی جی خان میانوالی سے تعلق رکھنے

والے سرکاری سکولوں کے سیکڑوں مرد و خواتین اساتذہ نے وفاقی وزیر تعلیم رانا تنویر حسین کی مریدکے رہائش گاہ آمد پر مختلف نعروں پر مبنی پلے کارڈ اٹھا کر احتجاجی مظاہرہ کیا ۔مظاہرے کی قیادت کرنے والے عرفان اللہ ،تنویر عباس اورراشد جمیل نے میڈیا کی موجودگی میں وفاقی وزیر رانا تنویر حسین کو تحریری درخواست دیتے بتایا کہ اگست 2021کو پنجاب کے سات اضلاع گوجرانوالہ میانوالی سیالکوٹ ڈی جی خان رحیم یار خان راجن پور میں حکومت نے دس ہزار ایس ٹی آئی ٹیچر زبھرتی کئے جن کو نو ماہ گزر چکے لیکن تنخواہیں ملنا تو دور کی بات اب فارغ کئے جانے کا کہا جارہا ہے ،دس ہزار اساتذہ کے پیچھے ہزاروں خاندان پل رہے ہیں ،مزید وقت گزر گیا تو سب کے سب جوکہ اعلی تعلیم یافتہ ہیں اوور ایج ہوجائیں گے ،پھر کہیں نوکری بھی نہیں ملے گی ۔ اگرہمارا مطالبہ نہ مانا گیا تو پنجاب اسمبلی کے سامنے احتجاج اور خود سوزیاں کریں گے۔وفاقی وزیر تعلیم رانا تنویر حسین نے کہا کہ سابق حکومت نے ہر شعبہ میں زیادتی کی ہے ،خاص کر تعلیم کے شعبے کے ساتھ کھلواڑ کیا گیا ہے ،حکومت کوشش کرے گی یہ مسئلہ حل ہو اور موجودہ بھرتی کئے گئے اساتذہ کو نو ماہ کی تنخواہ بھی ملے اور ان کو مستقل بھی کردیا جائے۔

موضوعات:رانا تنویر حسین