اسلام آباد (این این آئی)وزیراعظم کی ہدایت پر ملک بھرکے یوٹیلیٹی اسٹورزپر چینی اور آٹیکی قیمتوں میں کمی کردی گئی تاہم اس کی خریداری کیلئے شناختی کارڈ کی شرط رکھی گئی ہے۔ترجمان یوٹیلیٹی اسٹورز کے مطابق آٹے اور چینی کی قیمتوں میں کمی کا اطلاق فوری طورپرہوگا۔ترجمان نے بتایا کہ رمضان سبسڈی کے تحت ایک کلوچینی کی قیمت 15 روپے کم کی گئی جس کے بعد چینی85 روپے سے کم کرکے70 روپے کلو کردی گئی ہے۔دوسری جانب یوٹیلیٹی اسٹورزپر رمضان ریلیف پیکج کے تحت 950 روپے کا ملنے والا 20 کلو آٹے کا تھیلا 800 روپے میں فروخت کیا جائیگا۔ترجمان کے مطابق رمضان ریلیف پیکج میں 19 اشیاء کی فروخت شناختی کارڈ سے مشروط ہے لہٰذا سبسڈائزڈ اشیاء کی خریداری کیلئے شناختی کارڈ کے بغیر نہیں ہوسکتی۔