اسلام آباد (این این آئی)اسلام آباد ہائیکورٹ نے صدرپاکستان کوبلوچ طلبہ سے ملاقات کاحکم دیدیا۔ جمعہ کو ہائیکورٹ کے چیف جسٹس اطہر من اللہ کی سربراہی میں بلوچ طلبہ کو ہراساں کیے جانے کے خلاف درخواست پر سماعت ہوئی

جس میں عدالت نے سیکرٹری داخلہ کو بھی بلوچ طلبہ سے ملاقات کا حکم دیا۔چیف جسٹس نے اٹارنی جنرل کو حکم دیا کہ بلوچ طلبہ کی صدرپاکستان سے ملاقات کرائیں جس پر اٹارنی جنرل نے کہا کہ موجودہ صورتحال میں صدر پاکستان سے ملاقات کیلئے کچھ وقت دے دیں۔عدالت نے صدرپاکستان کے سیکرٹری کو آئندہ سماعت پر رپورٹ عدالت میں جمع کرانے کا حکم دیا ہے۔عدالت نے حکم دیا کہ سیکرٹری داخلہ بلوچ طلبہ کا تحفظ یقینی بنائیں، بلوچ طلبہ کا اپنے صوبے میں جانے پر ہراسگی یا اغوا کا خدشہ دور کریں۔عدالت نے استفسار کیا کہ جو طالب علم لاپتا ہوا تھا وہ اتنا عرصہ کہاں رہا، ایک دن بھی کوئی بچہ غائب کیوں ہے۔چیف جسٹس اطہر من اللہ نے ریمارکس دئیے کہ جو بلوچ طلبہ کے ساتھ ہو رہا ہے اس کا کوئی جواز نہیں ، موجودہ صورتحال جو بھی ہو اس سے فرق نہیں پڑتا، یہ عدالت تحمل کا مظاہرہ کرتی ہے اوراسے ہلکالیاجاتاہے۔