اسلام آباد (این این آئی) متحدہ اپوزیشن نے سپریم کورٹ کی جانب سے ڈپٹی اسپیکر کی رولنگ اور صدر مملکت کے اسمبلی تحلیل کرنے کے فیصلے کو غیر آئینی قرار دینے پر یوم تشکر منانے کا اعلان کرتے ہوئے کہاہے کہ پاکستان اور آئیں بچ گیا ہے،یہ آئین اور جمہوریت کی فتح ہے،عدلیہ کا وقار کو چار چاند لگے ہیں،عدلیہ پوری قوم کی امیدوں پر پوری اتری ہے۔
سپریم کورٹ آف پاکستان نے ڈپٹی اسپیکر قومی اسمبلی قاسم سوری کی 3 اپریل کی رولنگ پر از خود نوٹس کیس کا فیصلہ سناتے ہوئے قومی اسمبلی بحال کردی ہے۔سپریم کورٹ کے پانچ رکنی بینچ نے متفقہ فیصلہ دیا کہ ڈپٹی اسپیکر کی 3 اپریل کی رولنگ اور قومی اسمبلی کو تحلیل کرنا آئین سے متصادم تھا جس کے بعد سپریم کورٹ نے قومی اسمبلی بحال کردی۔سپریم کورٹ نے اپنے فیصلے میں کہا کہ قومی اسپیکر قومی اسمبلی کا اجلاس 9 اپریل کو بلائیں۔سپریم کورٹ آف پاکستان کی جانب سے فیصلہ سنانے کے بعد بلاول بھٹو نے ٹوئٹر پر بیان جاری کرتے ہوئے کہا کہ جمہوریت بہترین انتقام ہے، جیئے بھٹو، جیئے عوام،پاکستان زندہ باد۔میڈیا سے گفتگو کرتے ہوئے مولانا فضل الرحمن نے پوری قوم کو مبارک باد دی اور کہاکہ آئیں اور جمہوریت کی فتح ہے۔ انہوں نے کہاکہ عدلیہ پوری قوم کی امیدوں پر پوری اتری ہے،(آج) جمعہ کو یوم تشکر ہو گا،عوام جمعہ کی نماز کے بعد دو شکرانہ کے نوافل ادا کریں۔ اپوزیشن لیڈر شہباز شریف نے کہاکہ پاکستان بچ گیا،آئیں بچ گیا ہے،عدلیہ کا وقار کو چار چاند لگے ہیں ہم ان کے مشکور ہیں،پارلیمان کو مضبوط کیا ہے،رمضان میں بہت بڑا معرکہ سر کیا ہے۔انہوں نے کہاکہ عوام کے ساتھ مل کر مہنگائی اور بے روزگاری کی جنگ لڑیں گے۔ ایک سوال پر انہوں نے کہاکہ ہم آپ کو جینوئن سرپرائز دیں گے۔شہباز شریف نے کہاکہ متحدہ اپوزیشن نے غربت مہنگائی اور بے روزگاری کے خلاف جنگ لڑنی ہے،ہمیں اللہ کے سامنے سجدہ ریز ہونا ہے۔
