لاہور(این این آئی)پاکستان مسلم لیگ (ن) نے لاہور سے اسلام آباد کیلئے مہنگائی مکاؤ مارچ کا آغاز کر دیا،مرکزی نائب صدر مریم نواز اور پنجاب اسمبلی میں قائد حزب اختلاف حمزہ شہباز نے پارٹی کے مرکزی سیکرٹریٹ ماڈل ٹاؤن سے رہنماؤں اور کارکنوں کثیر تعداد کے ہمراہ مارچ کا آغاز کیا، مارچ کے شرکاء سارے راستے قیادت کے حق میں اور حکومت کے خلاف نعرے بازی کرتے رہے،
مارچ کی وجہ سے مختلف شاہراہوں پر ٹریفک کا بدترین جام رہا اور گاڑیوں کی طویل قطاریں لگی رہیں جس کی وجہ سے عام شہریوں کو شدید مشکلات کا سامنا کرنا پڑا، مارچ کے شرکاء کا مختلف مقامات پر اراکین اسمبلی نے کارکنوں کے ہمراہ پرتپاک استقبال کیا اور ان پر پھولوں کی پتیاں نچھاور کیں،پولیس کی طرف سے کسی بھی نا خوشگوار واقعہ سے نمٹنے کیلئے سکیورٹی کے غیر معمولی انتظامات کئے گئے۔ تفصیلات کے مطابق مہنگائی مکاؤ مارچ میں شرکت کیلئے کارکنان انفرادی طور پر اور اراکین اسمبلی کی قیادت میں صبح سویرے سے پارٹی کے مرکزی سیکرٹریٹ ماڈل ٹاؤن پہنچنا شروع ہو گئے جو سہ پہر کے وقت مرکزی نائب صدر مریم نواز اور پنجاب اسمبلی میں قائد حزب اختلاف حمزہ شہباز کی قیادت میں اسلام آباد کے لئے روانہ ہوئے۔ پارٹی کی مرکزی قیادت اور رہنما مارچ کیلئے خصوصی طور پر تیار کئے گئے کنٹینر پر سوار ہوئے اور کارکنوں کے نعروں کا ہاتھ ہلا کر جواب دیتے رہے۔ اراکین اسمبلی کی جانب سے مختلف مقامات پر استقبالیہ کیمپ لگائے گئے جہاں پر مارچ کے شرکاء کا پرتپاک استقبال کیا گیا او ران پر پھولوں کی پتیاں نچھاور کرکے استقبال کیا گیا۔ مارچ مختلف راستوں سے ہوتا ہے داتا دربار اور وہاں سے شاہدرہ پہنچا جہاں پر شرکاء کا پرتپاک استقبال کیا گیا۔پولیس کی جانب سے مارچ کے شرکاء اور استقبالیہ کیمپوں کی سکیورٹی کیلئے فول پروف انتظامات کئے گئے۔ علاوہ ازیں پی ڈی ایم کے زیر اہتمام مہنگائی مکاؤ مارچ کے لئے جے یوآئی لاہور کا قافلہ اسلام آباد کیلئے روانہ ہو گیا۔قافلے کی قیادت مرکزی ڈپٹی سیکرٹری جنرل مولانا امجد خان، مولانا سلیم اللہ قادری نے کی۔
