لاہور( این این آئی) سپیکر پنجاب اسمبلی چوہدری پرویز الٰہی نے وزیر اعظم عمران خان کے نام اپنے پیغام میں کہا ہے کہ وہ اپنے مشیران سے محتاط رہیں جو غلط بیانی سے حکومت اور میڈیا میں خلیج حائل کر رہے ہیں،تحریک انصاف کے ممبران کو میڈیا میں جانے سے روکنے کی اطلاعات ہیں ۔
پارٹی کی طرف سے اپنے ممبران کو مخصوص چینلز میں نہ جانے دینے پر تشویش ہے اس سے تحریک انصاف اپنا نقطہ نظر متوازن طریقے سے عوام کے سامنے نہیں رکھ پائے گی ۔میڈیا رپورٹس کے مطابق سپیکر پنجاب اسمبلی چوہدری پرویز الٰہی نے کہا کہ آزادی اظہار رائے جموریت کا حسن ہے، وزیر اعظم اور پارٹی قیادت سے فیصلے پر نظر ثانی کی درخواست کرتے ہیں۔سپیکر پنجاب اسمبلی کی جانب سے چند اخبار اور میڈیا ہائوسز کے اشتہارات بند کرنے پر بھی اظہار تشویش کیا گیا۔ انہوںنے کہا کہ اشتہارات پر پابندی بظاہر پیکا آرڈیننس کے تناظر میں لگائی گئی ہے، سرکاری اشتہارات عوام کے پیسے ہیں جن کو مخصوص اخبارات اور چینل کو نشانہ بنانے کے لیے استعمال نہیں کیا جانا چاہیے ۔انہوں نے کہا کہ حیرانی ہے کہ تحریک انصاف کی طرف سے میڈیا ہائوسز کو کیوں نشانہ بنایا جا رہا ہے ۔ وزیر اعظم نے مجھے میڈیا ہائوسز اور حکومت کے درمیان پیکا آرڈیننس کے حوالے سے معاملات سلجھانے کا ٹاسک دیا ہے ۔
