سڈنی (آن لائن ) آسٹریلوی وائٹ بال کپتان ایرون فنچ پاکستان آنے کے بے صبری سے منتظر ہیں ،ان کا کہنا ہے کہ ایک پلیئر ہونے کے ناطے میں وہاں پر کھیلنے کا مزید انتظار نہیں کرسکتا۔ کرکٹ آسٹریلیا کی جانب سے گزشتہ دنوں دورہ پاکستان کے نظر ثانی شدہ شیڈول کی تصدیق کر دی گئی،

اب وائٹ بال کپتان ایرون فنچ کو سیریز کا شدت سے انتظار ہے، اس دورے میں کینگروز 3 ٹیسٹ، اتنے ہی ون ڈے اور ایک ٹی 20 میچ کھیلیں گے۔ نظر ثانی شیڈول کے تحت اب ٹیسٹ سیریز کا آغاز کراچی کے بجائے راولپنڈی میں ہوگا اور اسی وینیو پر ہی تمام 4 وائٹ بال میچز کھیلے جائیں گے۔ ایرون فنچ نے کہا کہ بطور پلیئر میں وائٹ بال میچز کیلیے پاکستان جانے کا مزید انتظار نہیں کرسکتا، یہ دنیا کا وہ مقام ہے جوطویل عرصے تک انٹرنیشنل کرکٹ سے محروم رہا، جب پاکستان ایک کرکٹنگ قوم کے طور پر ا بھرے تو کھیل بہت ہی بہتر پوزیشن میں ہوتا ہے، میں سمجھتا ہوں کہ ہمیں دنیا بھر میں کرکٹ کو استحکام دینے کیلیے سب کچھ کرنا چاہیے، اگر ہم ایسا نہیں کر سکے تو کھیل کو ہی نقصان پہنچے گا،جہاں تک میں جانتا ہوں سیریز کے لیے بہترین کھلاڑیوں پر مشتمل مضبوط ترین سکواڈ دستیاب ہے۔واضح رہے کہ آسٹریلیا کی جانب سے دورئہ پاکستان کیلیے ٹیسٹ اور وائٹ بال سکواڈز کا اعلان جلد متوقع ہے۔ اس سے قبل ٹیسٹ کپتان پیٹ کمنز بھی واضح کرچکے کہ انھیں ریڈ بال سیریز میں بہترین کھلاڑیوں کا ساتھ حاصل ہوگا۔ انھوں نے یہ بھی کہا تھا کہ چند کھلاڑیوں کواب بھی کچھ تحفظات ہیں جنھیں دور کرنے کی کوشش ہورہی ہے، اگر کسی نے ٹور سے انکار کیا تو اس کے فیصلے کا احترام کیا جائے گا۔