کراچی (این این آئی)پاکستان سپر لیگ کے آغاز سے ٹھیک ایک دن قبل کراچی کے نیشنل اسٹیڈیم میں ویلڈنگ کے کام کے دوران آگ لگنے کا واقعہ پیش آیا۔ذرائع کے مطابق گزشتہ شب بجلی کے تاروں میں شارٹ سرکٹ کی وجہ سے اچانک آگ لگ گئی تھی۔آگ سے پی ایس ایل کے لیے خصوصی طور پر تیار کئے
جانیوالے کمنٹری باکس اور بائونڈری ایس ایم ڈی کی کیبل کو جزوی نقصان پہنچا ہے۔ذرائع کے مطابق خوش قسمتی سے آگ سے کوئی جانی نقصان نہیں ہوا۔رات گئے فائر بریگیڈ کی ایک گاڑی کی مدد سے آگ پر قابو پایا گیا۔واضح رہے کہ کل جمعرات سے کراچی کے نیشنل اسٹیڈیم میں پاکستان سپر لیگ (پی ایس ایل) کے ساتویں ایڈیشن کا آغاز ہوگانیشنل اسٹیڈیم میں کھیلے جانے والے پی ایس ایل کے ابتدائی میچ میں کراچی کنگز اور دفاعی چیمپئن ملتان سلطانز کی ٹیمیں آمنے سامنے ہوں گی۔کورونا کیسز کی وجہ سے کراچی میں 25 فیصد شائقین کو اسٹیڈیم میں داخلے کی اجازت ہوگی۔دوسری جانب پاکستان کرکٹ بورڈ کے چیف آپریٹنگ آفیسر (سی او او) سلمان نصیر نے کہا ہے کہ پاکستان سپر لیگ (پی ایس ایل) 7 کی تیاری مکمل ہے، کھلاڑیوں کی سیفٹی ترجیح ہے۔ایک بیان میں سلمان نصیر نے کہا کہ کورونا کیسز کی وجہ سے کراچی میں 25 فیصد شائقین کو اسٹیڈیم میں داخلے کی اجازت ہوگی۔انہوں نے کہا کہ لاہور میچز میں شائقین کی حاضری کا فیصلہ کورونا صورتحال کو دیکھ کر کریں گے۔انہوں نے کہاکہ پی ایس ایل میں مزید کسی ٹیم کےاضافے کاپلان نہیں ہے۔
