لندن (اے ایف پی)کورونا کی جنوبی افریقی قسم اومی کرون کا عالمی معیشت پر حملہ جاری ،تیل کی عالمی قیمتیں مزید کم، امریکی ، یورپی و ایشیائی اسٹاک مارکیٹس بھی گرگئیں، برینٹ کروڈ 5.1فیصد کم ہوکر69.81ڈالرز ،ویسٹ ٹیکساس 6.1فیصد کم ہوکر66.52ڈالرزفی

بیرل پر آگیا۔ غیرملکی میڈیاکے مطابق ڈیلرز کاکہناہےکہ تیزی سے پھیلنے والے اومی کرون کورونا وائرس کی مختلف اقسام پر قابو پانے کے لیے عالمی سطح پر کیے جانیوالے اقدامات کے اثرات کے حوالےسے سرمایہ کارتذبذب کاشکار ہیں جس کے باعث عالمی اسٹاکس اور تیل کی منڈیاں  گر گئیں۔اومی کرون کے تیزی سے دنیا بھر میں پھیلنے کے پیش نظر کئی ممالک میں جزوی لاک ڈائون اور نئی پابندیوں کے خدشہ کے سبب برینٹ کروڈ 5.1فیصد کم ہوکر69.81ڈالرز ،ویسٹ ٹیکساس 6.1فیصد کم ہوکر66.52ڈالرزفی بیرل پر آگیا،مارکیٹ میں سودے کے دوران ایک وقت ایسا بھی آیا جب تیل ایک موقع پر پانچ فیصد سے زیادہ گر گیا تھا ، ادھر نیو یارک ڈائو،یورو اسٹاکس،لندن ایف ٹی ایس ای،فرانکفرت، پیرس، ٹوکیو، ہانگ کانگ اور شنگھائی اسٹاکس میں کمی ریکارڈ کی گئی۔ نیو یارک -ڈاؤ جونز انڈیکس 1.3،لندن کا بینچ مارک ایف ٹی ایس ای انڈیکس ایک ،فرانکفرٹ 1.9،پیرس ایک،یورو اسٹاکس ایک،ٹوکیو 2.1،ہانگ کانگ1.9 اور شنگھائی 1.1 فیصد کمی کا شکار رہا۔