اسلام آباد (این این آئی)سیٹیزن پورٹل پر عوامی مسائل کے حل میں سرکاری افسران کی جعل سازی کا انکشاف ہوا ہے ۔ ہفتہ کو جعل سازی پر افسران کے خلاف کارروائیوں کی رپورٹ وزیراعظم کو پیش کر دی گئی ،پی ایم ڈی یو نے 254 سرکاری افسران کے ڈیش بورڈز پر

جعل سازی پر رپورٹ تیار کی،عوامی شکایات پر کارروائی سے متعلق غلط بیانی پر سرکاری افسران کے خلاف کارروائی کی گئی ۔رپورٹ کے مطابق پنجاب کے 154،کے پی کے 86،سندھ کے 3 اور وفاق کے 11 افسران کے ڈیش بورڈز کی تحقیقات کی گئی ،تحقیقات میں پنجاب کے 44 سرکاری اہلکار جعل سازی کے مرتکب قرار پائے گئے ۔رپورٹ کے مطابق چیف سیکرٹری کے پی کے نے 39 سرکاری اہلکاروں کے خلاف کارروائی کی،رپورٹ کے مطابق جعل سازی ثابت ہونے والے سرکاری ملازمین معطل کر دئیے گئے، آئی جی پنجاب کی تحقیقات کے بعد 45 سرکاری اہلکاروں کے خلاف کارروائی کی گئی ۔ رپورٹ کے مطابق آئی جی کے پی کے کی 10 اہلکاروں اور آئی جی سندھ کی 3 سرکاری اہلکاروں کے خلاف کارروائی کی گئی ۔وزیراعظم نے صوبوں کے چیف سیکرٹریز اور آئی جیز کو ہدایات جاری کیں ۔وزیر اعظم نے کہاکہ عوامی مسائل کے حل میں کوتاہی بالکل برداشت نہیں کی جائے گی،عوامی مسائل کے حل سے متعلق غلط بیانی کرنے والے افسران کے خلاف فوری کارروائی عمل میں لائی جائے گی۔ وزیر اعظم نے کہاکہ سیٹیزن پورٹل پر عوامی شکایات کو خود مانیٹر کرتا ہوں۔وزیراعظم نے کہاکہ شہریوں کی شکایات کے حل پر غلط بیانی کرنے والے افسران سے رعایت نہیں کی جائے گی۔

موضوعات:پاکستان سٹیزن پورٹل