اسلام آباد (صباح نیوز)رواں مالی سال کی پہلی سہہ ماہی میں تین صوبوں کا بجٹ سرپلس جبکہ صوبہ خیبر پختونخوا کا بجٹ خسارے میں رہا۔ وزارت خزانہ کی دستاویز ات کے مطابق جولائی تا ستمبر سوائے خیبر
پختونخوا کے تمام صوبوں کی آمدنی کےمقابلہ میں اخراجات کم رہے اور صوبوں نے280 ارب11کروڑ روپے کا سرپلس بجٹ دیا۔ جبکہ اسی عرصہ میں خیبر پختونخوا کا بجٹ تین ارب18کروڑ خسارے میں رہا۔ اگر گزشتہ سال کا جائزہ لیا جائے تو اسی عرصہ میں صوبوں نے57ارب77کروڑ روپے کا سرپلس بجٹ دیا تھا جبکہ سندھ اور خیبرپختونخوا کے بجٹ خسارے میں رہے تھے۔ رواں مالی سال پنجاب نے سب سے زیادہ 183ارب23کروڑ 80لاکھ روپے، سندھ 60ارب25کروڑ60لاکھ روپے اوربلوچستان نے36ارب 61کروڑ30لاکھ روپے کا سرپلس بجٹ دیا۔ صوبوں کے سرپلس بجٹ کے باعث وفاقی حکومت کا بجٹ خسارہ جی ڈی پی کا 0.8یا438ارب 49کروڑ روپے تک محدودکرنے میں مدد ملی۔ راواں مالی سال کی پہلی سہہ ماہی میں پنجاب کی مجموعی آمدنی 488ارب 80کروڑ50لاکھ اور اخراجات305ارب 56 کروڑ 80لاکھ روپے رہے، اسی طرح سندھ کی کل آمدنی 280ارب37کروڑ 90لاکھ روپے اور اخراجات 220ارب12کروڑ30لاکھ روپے رہے۔
