باجوڑ،لاہور( آن لائن) تحصیل خار کے علاقے راغگان ڈیم میں سیکورٹی پر مامور پولیس اہلکاروں پر ریموٹ کنٹرول بم دھماکے میں دو پولیس اہلکار شہید ہوگئے۔ ایس ایچ او قابل شاہ کے مطابق باجوڑ کی تحصیل خار کے علاقے راغگان ڈیم میں سیکورٹی پر مامور پولیس

اہلکاروں پر ریموٹ کنٹرول بم سے حملہ کیا گیا، اور دھماکے میں دو پولیس اہلکار شہید ہوگئے، جب کہ دھماکے کی شدت اور آواز سے دور دور تک خوف و ہراس پھیل گیا۔ڈی پی او عبدالصمد خان کے مطابق دھماکے کے بعد پولیس اور فورسز کی ٹیمیں جائے وقوعہ پر پہنچ گئیں اور پورے علاقے کو گھیرے میں لے کر سرچ آپریشن شروع کردیا گیا، جب کہ لاشوں کو اسپتال منتقل کردیا گیا ہے، شہید ہونے والے اہلکاروں کی شناخت کانسٹیبل عبدالحیان اور کانسٹیبل سراج کے نام سے ہوئی ہے۔ واقعہ کی فوری تحقیقات شروع کردی ہے، دوسری جانب پاکستان مسلم لیگ (ن) کے صدر اور قائد حزبِ اختلاف شہباز شریف نے تحصیل خار میں بم دھماکہ کی شدید مذمت، پولیس اہلکاروں کی شہادت پر اظہار افسوس کرتے ہوئے کہا ہے کہ پولیس کے افسروں اور جوانوں نے دہشت گردی کے خلاف عظیم قربانیاں دی ہیں پولیس جس سرفروشی اور شجاعت کے جذبے سے دہشتگردوں سے ٹکرائی ہے، قوم کو اس پر فخر ہے ۔ انہوں نے کہا کہ افواج پاکستان، رینجرز، ایف سی، پولیس سمیت تمام قانون نافذ کرنے والے اداروں کی دہشت گردی کے خاتمے کے لئے قربانیاں اور کاوشیں قابل تحسین و سرمایہ افتخار ہیں ۔ شہدا کے اہل خانہ کو سلام پیش کرتے ہیں اور ان سے ہمدردی کا اظہار کرتے ہیںاللہ تعالیٰ شہداء کے درجات بلند فرمائے اور لواحقین کو صبر جمیل دے۔ آمین

موضوعات:دھماکہ