کراچی(این این آئی)انسداد دہشت گردی کی خصوصی عدالت نے جیل سپرنٹنڈنٹ کو لیاری گینگ وار کے سرغنہ عزیر بلوچ کی آنکھوں کاعلاج کرانے کاحکم دے دیاہے۔ہفتہ کوسینٹرل جیل کمپلیکس میں انسداد دہشت

گردی کی خصوصی عدالت میں لیاری گینگ وار کے سرغنہ ملزم عزیر بلوچ کی جیل میں طبی سہولتوں کی فراہمی کیلئے درخواست پر سماعت ہوئی۔درخواست گزارعزیربلوچ کی والدہ کے وکیل عابد زمان ایڈووکیٹ نے بتایا کہ عزیر بلوچ کی بصارت بہت زیادہ کمزورہوگئی ہے، بصارت کی کمزوری اوردردکی وجہ سے انفیکشن ہونے کا خدشہ ہے۔جس پر عدالت نے عزیر بلوچ کی آنکھوں کاعلاج کرانیکاحکم دیتے ہوئے جیل سپرنٹنڈنٹ سے7اکتوبرکو ملزم کی میڈیکل رپورٹ بھی طلب کرلی۔عدالت نے حکم دیا کہ آئندہ سماعت پرملزم کی طبی سہولیات کی رپورٹ بھی پیش کی جائے۔خیال رہے کہ عزیر بلوچ اب تک گیارہ مقدمات میں بری ہوچکے ہیں ، لیاری گینگ وار کے سرغنہ پر مجموعی طور پر 61 مقدمات درج ہیں، جن میں قتل کے مقدمات بھی شامل ہیں۔