پشاور، لاہو ر(مانیٹرنگ ڈیسک ،این این آئی)پشاور سے امریکی بچی کو ہراساں کرنے والا شہری گرفتار، میڈیا رپورٹس کے مطابق امریکی خفیہ ایجنسی ایف بی آئی کی شکایت پر ایف آئی اے نے پشاور میں کارروائی کی اور امریکہ میں بچی کو ہراساں کرنے والے ملزم کو دھرلیا۔
فیڈرل انویسٹی گیشن ایجنسی کے مطابق چائلڈ پورنو گرافی سیل نے ملزم کو حیات آباد سے گرفتارکیا ہے۔متاثرہ بچی کے والدین نے امریکی پولیس کو شکایت درج کرائی تھی،جس کی تحقیقات ہونے کے بعد پولیس نے ایف آئی اے کو کیس بھیجا تھا،ملزم نے دوران تفتیش اعتراف جرم کرلیا۔کیس کی مزید تفصیلات سامنے نہیں آئیں اور نہ ہی اس حوالے سے کوئی اعلامیہ جاری کیا گیا کہ آیا ملزم کو ایف بی آئی کے حوالے کیا جائے گا یا نہیں۔دوسری جانب لاہور میں ایس پی کینٹ عیسی سکھیرا کی ہدایت پر تھانہ ڈیفنس اے پولیس نے بروقت کارروائی کرتے ہوئے 13 سالہ بچے ریاض کے ساتھ بدفعلی کرنے والے دو ملزمان کو گرفتار کر لیا گیا۔ گرفتار ملزمان میں ابو بکر اور عمیر شامل ہیں، جبکہ تیسرے ملزم فیضان کی گرفتاری کے لیے چھاپے مارے جا رہے ہیں۔ ایس پی کینٹ عیسی سکھیراکے مطابق ملزمان متاثرہ بچے کے محلے دار ہیں، ملزمان نے ورغلا کر بچے کو بدفعلی کا نشانہ بنایا، متاثرہ بچے کی والدہ کی مدعیت میں ملزمان کے خلاف مقدمہ درج کر کے تحقیقات کاآغاز کردیاگیا ہے ۔
