کراچی (این این آئی)شادی کرنے کے لئے بھی کورونا ویکسینیشن لازمی ہو گی، کرونا وائرس کے پھیلاو کو روکنے اوراین سی اوسی فیصلوں پر عملدرآمد کرتے ہوئے محکمہ داخلہ سندھ نے نئی ایس اوپیز جاری کردی ہیں۔ایک سرکاری حکم نامہ میں ٹرینوں میں سفر کے لئے کرونا ویکسین لازمی قراردی گئی ہے اورویکسین کے بغیر ٹرین بس میں سفر کرنا ممنوع ہوگا۔
محکمہ داخلہ سندھ کا کہنا ہے کہ مویشی منڈی,ہوٹلز,ریسٹورینٹس اور مسافر بسوں میں بھی داخلہ کورونا ویکسین سے مشروط ہوگا۔یہ فیصلہ عید الاضحی پر شہریوں کی نقل وحمل اور کرونا کے پھیلاو کے خدشات پر کیاگیا۔شادی ہالز میں آوٹ ڈور تقریبات میں شرکت کے لئے بھی کورونا ویکسین لازمی ہوگی جبکہ مویشی منڈیوں میں جانے والوں کو بھی کورونا ویکسین کارڈ دکھانا ہوگا۔ واضح رہے کہ پاکستان میں کورونا وائرس کی چوتھی لہر کے وار جاری ہیں، کورونا کیسز میں مسلسل اضافہ ہو رہا ہے جبکہ مثبت کیسز کی شرح ساڑھے 5 فیصد سے زائد ہو گئی۔سماجی فاصلے، ماسک کو نظر انداز کرنے اور ایس او پیز کی خلاف ورزیوں کے باعث پاکستان میں ایک بار پھر کورونا وائرس کی ہلاکت خیزیوں اور کیسز میں اضافہ جاری ہے، ملک کورونا مریضوں کے حوالے سے مرتب کی گئی فہرست میں 30 ویں نمبر پر پہنچ چکا ہے۔نیشنل کمانڈ اینڈ آپریشن سینٹر (این سی او سی) کے اعداد و شمار کے مطابق پاکستان میں گزشتہ 24 گھنٹوں کے دوران کورونا وائرس کے مزید 2 ہزار 783 کیسز سامنے آئے ہیں، مزید 39 افراد اس موذی وباء کے سامنے زندگی کی بازی ہار گئے، کورونا کے مزید 1 ہزار مریض شفایاب ہو گئے، جبکہ مثبت کیسز کی شرح 5 اعشاریہ 65 فیصد ہو گئی۔پاکستان بھر میں کورونا وائرس کے اب تک کْل 22 ہزار 760 مریض انتقال کر چکے ہیں
جبکہ اس موذی وائرس کے کْل مریضوں کی تعداد 9 لاکھ 86 ہزار 668 ہو چکی ہے۔ملک بھر میں ہسپتالوں، قرنطینہ سینٹرز، وینٹی لیٹرز اور گھروں میں کورونا وائرس کے کْل 45 ہزار 579 مریض زیرِ علاج ہیں، جن میں سے 2 ہزار 508 مریضوں کی حالت تشویش ناک ہے، جبکہ کْل 9 لاکھ 18 ہزار 329 مریض اب تک اس بیماری
سے شفایاب ہو چکے ہیں۔گزشتہ 24 گھنٹوں میں ملک میں کورونا وائرس کے مزید 49 ہزار 247 ٹیسٹ کیئے گئے، جبکہ اب تک کْل 1 کروڑ 53 لاکھ 45 ہزار 158 کورونا ٹیسٹ کیئے جا چکے ہیں۔پاکستان بھر میں گزشتہ 24 گھنٹوں کے دوران 5 لاکھ 61 ہزار 535 افراد کو کورونا وائرس کی ویکسین دی گئی، جبکہ اب تک کْل 2 کروڑ 22 لاکھ 22 ہزار 701 کورونا ویکسین کی خوراکیں دی جا چکی ہیں۔
