لاہور(این این آئی) پنجاب حکومت نے صوبائی وزیر ِ ہائوسنگ میاں محمود الرشید کی وزارت تبدیل کرتے ہوئے انہیں بلدیات کا قلمدان سونپ دیا ۔پنجاب کے وزیرِ اعلی سردار عثمان بزدار کے پرنسپل سیکریٹری طاہر خورشید کی طرف سے وزارت کی تبدیلی کا نوٹیفکیشن جاری کیاگیا ۔نئے وزیرِ بلدیات پنجاب میاں
محمود الرشید کو ان کی نئی ذمے داریوں سے آگاہ کر دیا گیا ۔گزشتہ حکومت میں میاں محمود الرشید پنجاب میں قائد حزب اختلاف تھے۔ وہ پاکستان تحریک انصاف کے آغاز سے ہی عمران خان کے ساتھی ہیں ۔ ان کی سیاسی وابستگی پہلے جماعت اسلامی سے تھی جسے چھوڑ کر وہ پاکستان تحریک انصاف میں شامل ہوئے۔
