اسلام آباد (این این آئی)ترکی کی جانب سے پاکستان سمیت دیگر ممالک کے مسافروں پر 14دن کی قرنطینہ کی پابندی سے متعدد پاکستانی استنبول میں پھنس گئے۔ترجمان دفتر خارجہ کے مطابق پاکستانی سفارتخانہ ترک حکام سے رابطے میں ہے، پاکستانی مسافروں نے قواعد و ضوابط کے اعلان سے قبل اپنا سفر شروع کیا تھا۔ سفارتخانے

کی درخواست پر ترک حکام نے ایک دن کی چھوٹ یکم جون 2021 کیلئے منظور کی تھی۔ ایئرپورٹ پر پی سی آرٹیسٹ کے منفی آنے پر مسافروں کو ترکی داخلے کی اجازت ہوگی۔ترک حکام کی جانب سے پاکستان سے آنے والے مسافروں کے لیے کے نئے سفری قوانین جاری کیے گئے ہیں۔یکم جون سے پاکستان سے آنے والے تمام مسافروں پر ترک حکام کی جانب سے 14 دن کی قرنطینہ کی پابندی کے نئے فیصلے کے بعد پاکستانی سفارت خانے کے حکام نے ترک حکام سے رابطہ قائم کیا ہے۔نئے ترک سفری قوانین کے نتیجے میں متعدد پاکستانی جو 31 مئی اور یکم جون کے درمیانی رات سفر کر رہے تھے استنبول ہوائی اڈے پر پھنس کر رہ گئے تھے، ان تمام پاکستانیوں کو اس صورتِ حال سے بچانے کے لیے پاکستانی سفارت خانے نے ترک حکام سے رابطہ قائم کرتے ہوئے منفی پی سی آر ٹیسٹ رکھنے والے پاکستانیوں کو ترکی داخل ہونے کی اجازت دلوائی ہے۔انقرہ میں پاکستانی سفارت خانہ اور قونصلیٹ جنرل استنبول نے پاکستانی مسافروں سے مسلسل رابطہ قائم کر کھا ہے تا کہ ان ضوابط کے اثرات کو کم سے کم کیا جاسکے اور پاکستانی مسافروں کو ہر ممکنہ مدد فراہم کی جاسکے۔پاکستان سے ترکی آنے والے مسافروں سے گزارش ہے کہ ترک حکام کی نئے سفری ضوابط کا جائزہ لیتے ہوئے اپنے سفری منصوبوں کا از سر نو جائزہ لیں۔ ترک حکام وقتاً فوقتاً ان ضوابط پر نظر ثانی کرتے رہیں گے۔