اسلام آباد(اے پی پی)وفاقی وزیر برائے منصوبہ بندی و ترقی اسد عمر نے کہا ہے کہ گذشتہ مالی سال جولائی تا اپریل گردشی خسارہ 449 ارب روپے تھا جو کہ رواں برس اسی عرصے کے دوران کم ہو کر 260 ارب رہ گیا ہے ، گردشی خسارے میں 189 ارب کی کمی واقع ہوئی ہے۔
منگل کو ایک ٹویٹ میں اسد عمر نے بتایا کہ رواں برس پورے سال کا گردشی خسارہ پاکستان مسلم لیگ ن کی حکومت کے آخری سال کے گردشی خسارے کی نسبت 100 ارب سے زائد کم رہنے کی توقع ہے۔ توانائی کے شعبے کی کارکردگی میں یہ بہتری اور گردشی قرضوں میں اضافے میں سست روی ، مستقل سخت محنت ، تجزیاتی اعداد و شمار پر مبنی فیصلہ سازی اور فیصلہ سازوں اور طاقتور اشرافیہ کے مابین گٹھ جوڑ توڑنے کی آمادگی کا نتیجہ ہے۔دریں اثنا ایک نجی ٹی وی کو انٹرویو دیتے ہوئے وفاقی وزیر خزانہ شوکت ترین نے کہا ہے کہ ہمیں گروتھ ریٹ کو متنازعہ نہیں بنانا چاہیے، ملک کے معاشی ایشوز، عوامی ایشوز پر سیر حاصل گفتگو ہونی چاہیے، اس بحث میں تمام معاشی ماہرین کو شامل ہونا چاہیے، ملک میں ہائوسنگ، زراعت، انڈسٹریز اور برآمدات کا شعبہ ترقی کی راہ پر گامزن ہے، امید ہے کہ آئندہ برس گروتھ ریٹ 5 فیصد اور اس سے اگلے سال 6 فیصد پر بھی جائے گا، چین نے ہمارے لئے اتنا بڑا
انفراسٹرکچر قائم کیا ہے، سڑکیں اور پاور سیکٹر قائم کیا ہے، ہمیں اس سے بہترین انداز میں فائدہ اٹھانے کی ضرورت ہے، ہائوسنگ سیکٹر معیشت میں گروتھ کا انجن ہوتا ہے، ہائوسنگ کے شعبہ کی ترقی سے کسی ایک شہر میں نہیں بلکہ پورے ملک میں گروتھ ہوتی ہے، تاریخ میں پہلی مرتبہ ٹیکس ڈیفالٹرز کو جیل بھیجا جائے گا۔
