نئی دہلی(این این آئی) نیوزی لینڈ کے خلاف پہلے سیمی فائنل میں سنسنی خیز مقابلے کے بعد بھارتی ٹیم کی شکست سے دلبرداشتہ ہو کر دو شائقین جان کی بازی ہار گئے۔سیمی فائنل میں نیوزی لینڈ نے باؤلرز کے عمدہ کھیل کی بدولت بھارت کو شکست دیکر لگاتار دوسری مرتبہ ورلڈ کپ فائنل کھیلنے کا اعزاز حاصل کر لیا تاہم بھارت کی یہ شکست دو بھارتی شائقین کی جان لے گئی۔ریاست بہار کے ضلع کشن گنج میں بدھ کو میچ دیکھتے ہوئے ایک کرکٹ شائق اشوک

پسوان دل کا دورہ پڑنے سے انتقال کر گیا، انہیں ہسپتال لے جایا گیا لیکن وہ اس سے قبل ہی انتقال کر چکے تھے۔اشوک مقامی ہسپتال میں شفٹ مکمل کرنے کے بعد گھر میں میچ دیکھ رہے تھے کہ بھارتی کی شکست کے اثرات نمودار ہوتے دیکھ کر انہیں دل کا دورہ پڑ گیا۔دوسری جانب ضلع ہوگلی کے رہائشی 33سالہ سری کانتہ میٹی کو میچ کے دوران مہندرا سنگھ دھونی کے آؤٹ ہونے کے فوراً بعد دورہ پڑا، انہیں ہسپتال لے جایا گیا جہاں انہیں مردہ قرار دے دیا گیا۔