حافظ آباد (این این آئی)پاکستان مسلم لیگ (ن) کے سینئر نائب صدر شاہد خاقان عباسی نے حکومت پر تنقید کرتے ہوئے کہا ہے کہ ہم اقتدار نہیں بلکہ عوام کے مسائل کے حل کی جنگ لڑ رہے ہیں، آپ کیا چیز،ہم نے مشرف کی آمریت بھی دیکھی ہے۔(ن)لیگ کے ورکرز کنونشن سے خطاب میں شاہد خاقان عباسی نے کہا کہ عوام کا حق چھینا جا رہا ہے۔ انہوں نے کہاکہ پارلیمان کی بالادستی سے ملک چلتے ہیں۔ سابق وزیر اعظم نے کہاکہ سلیکٹڈ وزیراعظم نے ملک تباہ کر دیا، لوگ نواز شریف کی طرف دیکھ رہے ہیں۔

انہوں نے کہا کہ وزیراعظم روس جا رہے ہیں لیکن ان کی جانب سے بیان آیا کہ انہیں نہیں بلایا، اب امریکا بھی اس قسم کی باتیں کر رہا ہے، یہ ملک کی بد نصیبی ہے۔انہوں نے کہاکہ ضمیر ان کا ملامت کرتا ہے جن کے پاس ضمیر ہو، میں تیار ہوں، ڈرتا نہیں، گرفتار کرو۔ اگر غیرت ہے تو میدان میں سیاست کرو۔مریم اورنگزیب نے کہا کہ سلیکٹڈ ویراعظم کو لانے کیلئے نواز شریف کو جیل میں ڈالا گیا، نواز شریف کا قصور سی پیک اور ایٹمی قوت بنانا تھا۔انہوں نے کہاکہ کوٹ لکھپت جیل کا تالا جلد ٹوٹے گا، نواز شریف باہر آئیں گے، نواز شریف جیل میں بھی وزیراعظم ہی ہیں، عمران خان کو ن لیگ کے شیروں سے ڈر لگتا ہے۔مریم اورنگزیب نے کہاکہ نواز شریف دور میں ملک ترقی کر رہا تھا، بتائیں 10 ماہ میں بھینک مانگنے کیلئے کتنا خرچہ کیا، نواز شریف غیر قانونی طور پر جیل میں قید ہیں، کابینہ اجلاس میں کل مہنگائی اور بے روزگاری پر بات نہیں ہوئی۔ مسلم لیگ نون کے رہنما نے احسن اقبال نے کہا کہ ملک آج نازک دور سے گزر رہا ہے، ہم پاکستان کو بچانے نکلے ہیں، نواز شریف نے ملک کو اندھیروں سے نکالا، نواز شریف نے پاکستان کو ناقابل تسخیر بنایا، پی ٹی آئی کے بینامی اکاؤنٹس ہیں، عمران خان نے بے نامی اکاؤنٹس کے ذریعے دھرنے دیئے، سازش کے ذریعے الیکشن کو سلیکشن میں تبدیل کیا گیا، ن لیگ اقتدار میں آ جاتی تو پاکستان ایشیا کا ٹائیگر بن جاتا۔