ممبئی (آن لائن)بھارت کی مغربی ریاست مہاراشٹرمیں بدھ کودہائی کی شدیدترین مون سون بارشوں نے تباہی مچا دی ہے، جس کے دوران ایک ڈیم ٹوٹنے کے نتیجے میں چھ افرادہلاک اورکم ازکم 18لاپتہ ہوگئے ہیں،یہ بات حکام نے بتائی۔ ”ڈرون استعمال کرکے ہم نے چھ لاشوں کی نشاندہی کی ہے

اور18سے زائدافرادابھی تک لاپتہ ہیں،یہ بات بھارت کی نیشنل ڈیزاسٹرریسپانس فورس (این ڈی آرایف)کے ترجمان الوک اواستھی نے غیرملکی خبررساں ادارے کوبتائی۔ اواستی نے مزیدبتایاکہ گزشتہ رات تیواڑی ڈیم ٹوٹنے کے بعدہم نے دوٹیمیں تشکیل دی ہیں اورزندہ بچ جانے والے افرادکوتلاش کررہے ہیں“۔ این ڈی آرایف کے علاوہ پولیس ٹیمیں اورسرکاری اہلکاربھی ممبئی سے 275کلومیٹر(70میل)دورراتنگری میں زندہ بچ جانے والے افرادکوتلاش کررہے ہیں۔ ممبئی میں منگل کے روز شدید بارشوں کے بعد ایک کچی آبادی میں دیوار گرنے سے ہلاکتوں کی تعداد بڑھ کر 24ہو گئی ہے جبکہ آنیوالے دنوں میں مزید بارش متوقع ہے۔20ملین آبادی کے ساحلی شہر میں بدھ کے روز شدید بارش کا سلسلہ جاری رہا جہاں معمولات زندگی معطل ہو کر رہ گئے ہیں جیسا کہ سیلاب پانی نے ریلوے لائنوں کو منقطع کردیا ہے، ایئرپورٹ کا مرکزی رن وے بند ہو گیا ہے اور ٹریفک کا نظام درہم برہم ہو چکا ہے۔بھارت میں مون سون کے دوران مسلسل بارشوں کی وجہ سے بوسیدہ سٹرکچرز کے باعث عمارتیں منہدم ہونے اور ڈیم ٹوٹنے کے واقعات عام ہوتے ہیں۔