اسلام آباد(این این آئی) سعودی وزیر اطلاعات ڈاکٹر عواد بن صالح العواد نے وزیر مذہبی امور نور الحق قادری سے ملاقات کی ۔ ملاقات میں اہم امور پر تبادلہ خیال کیا گیا ۔ تفصیلات کے مطابق اتوار کو سعود ی وزیر اطلاعات ڈاکٹر عواد بن صالح العواد نے وزیر مذہبی امور نور الحق قادری سے ملاقات کی۔ ملاقات میں اہم امور پر تبادلہ خیال کے علاوہ عمرہ کے ویزہ کو آسان بنانے کیلے تجاویز پر بھی غور کیا گیا۔ اس مو قع پر سعودی وزیر اطلاعات ڈاکٹر عواد بن صالح العواد نے کہا کہ
سعودی قیادت نئی پاکستانی حکومت کے ساتھ مل کر کام کرنے کی خواہشمند ہے ۔وزیر مذہبی امور نور الحق نے سعودی قیادت کی خواہشات کا خیر مقدم کیا۔اس موقع پر دونوں ممالک کے رہنماؤں کے مابین روابط بڑھانے پر اتفاق کیا گیا۔ وفاقی وزیر مذہبی امور نے آئندہ سال حج کیلئے پاکستانی حجاج کرام کی تعداد میں کم ازکم 50 ہزار کے تعداد کے اضافے کا مطالبہ کیا۔انہوں نے کہا کہ مکہ مکرمہ اور مدینہ منورہ میں حرم کے قریب پاکستان ہائوس کیلئے جگہ فراہم کی جائے۔
