راولپنڈی(سی پی پی)پاک فوج نے انٹیلی جنس اطلاعات پر بلوچستان کے علاقے آواران میں آپریشن کے دوران 4دہشت گردوں کو ہلاک کردیا جبکہ فائرنگ کے تبادلے میں ایک اہلکار شہید اور دوسرا زخمی ہو گیا ،دہشت گردوں کے ٹھکانے سے اسلحہ و گولہ بارود برآمد کرلیا گیا،مارے گئے دہشت گرد مشکئی میں سکیورٹی فورسزکے قافلے پر حملے میں ملوث تھے جس میں پاک فوج کے پانچ جوانوں نے جام شہادت نوش کیا تھا۔آئی ایس پی آر کے مطابق بلوچستان کے علاقے آواران میں انٹیلی جنس اطلاعات

کی بنیاد پر سرچ آپریشن کیا تو اس دوران سکیورٹی فورسز پر فائرنگ شروع کردی گئی جس کے جواب میں سکیورٹی فورسز کے جوانوں نے فائرنگ کرکے 4دہشت گردوں کو موت کے گھاٹ اتار دیا ۔دہشت گردوں کی فائرنگ سے ایک سکیورٹی اہلکاررمز علی شہید اور نائیک یعقوب زخمی ہو گئے جنہیں ہسپتال میں طبی امداد کیلئے منتقل کردیا گیا۔دہشت گردوں کے ٹھکانے سے بھاری مقدار میں اسلحہ اور گولہ بارود بھی برآمد کرلیا گیا ۔ چوبیس سالہ شہید رمز علی کا تعلق خیر پور میرس سندھ سے ہے ۔