لاہور (مانیٹرنگ ڈیسک) لاہور میں شہباز شریف کے داماد کے پلازے علی ٹاور میں آگ لگ گئی، ایک نجی ٹی وی چینل کی رپورٹ کے مطابق ایم ایم عالم روڈ پر واقع اس کمرشل پلازے میں آگ لگنے کی وجہ سے خارجی دروازہ بند ہو گیا، اس پلازے میں رہائشی فلیٹس ہونے کی وجہ سے سینکڑوں افراد یہاں پھنس کر رہ گئے، یہ آگ پلازہ کی بیسمنٹ میں لگی اور پھیل گئی جس کا دھواں دور سے بھی دیکھا جا سکتا تھا۔
ایک نجی ٹی وی چینل کی رپورٹ کے مطابق اپنی جان بچانے کے لیے کئی افراد نے چھلانگیں بھی لگا دیں، اس وجہ زخمی ہونے والوں کو ریسکیو ٹیموں نے فوری طور پر ہسپتال پہنچا دیا، فائر بریگیڈ اور ریسکیو ٹیموں کا آپریشن جاری ہے، اس موقع پر پنجاب کے صوبائی وزیر اطلاعات بھی وہاں پہنچ گئے اور انہوں نے امدادی کارروائیوں کا جائزہ لیا، ابھی تک پلازے میں آگ لگنے کی وجہ معلوم نہیں ہو سکی ہے۔
