راولپنڈی (مانیٹرنگ ڈیسک )پاک فوج کے زیر اہتمام 53ویں یوم دفاع کے موقع پر جی ایچ کیو میں شاندار اور پروقار تقریب کا انعقاد کیا گیا تھا جس میں وزیراعظم عمران خان ، اپوزیشن لیڈر شہباز شریف ، چیئرمین سینٹ صادق سنجرانی، سپیکر قومی اسمبلی اسد قیصر اور چیئرمین پیپلزپارٹی بلاول بھٹو زرداری بھی شریک ہوئے، وزیراعظم عمران خان مہمان خصوصی تھے۔ تقریب کے اختتام پر چیئرمین پیپلزپارٹی بلاول بھٹو زرداری کو دیکھ کر شرکا

نے بے پناہ خوشی کا اظہار کرتے ہوئے ان کے ساتھ سیلفیاں بنوائیں، بچے ، جوان اور فوجی جوان بلاول بھٹو زرداری کے گرد کھڑے ہو گئے اور ان کیساتھ نہایت گرمجوشی سے گلے ملتے اور ہاتھ ملانے کے ساتھ ساتھ سیلفیاں بھی بنواتے رہے۔ اس موقع پر جلد فوجی افسران بلاول بھٹو کو لوگوں کے جھرمٹ سے نکال کر گاڑی تک لائے ۔ تقریب میں غیر ملکی سفیروں کی کثیر تعداد نے شرکت کی۔ آرمی چیف جنرل قمر جاوید باجوہ نے تمام مہمانوں کو رخصت کیا۔