اسلام آباد (این این آئی)پاک فوج کے شعبہ تعلقات عامہ ( آئی ایس پی آر) کے ڈائریکٹرجنرل میجر جنرل آصف غفور نے کہا ہے کہ قوم یقین رکھے کوئی ایسا خطرہ نہیں جس سے پاک فوج نمٹ نہیں سکتی۔ایک انٹرویومیں ڈی جی آئی ایس پی آر میجر جنرل آصف غفور نے کہا کہ شہید تو شہید ہیں، پاکستان کیلئے جان دینے والا ہر فرد قابل احترام ہے، مسلح افواج کی پہلی ترجیح امن قائم کرنا ہے۔ انہوں نے کہا کہ ہمیں اپنے شہداء کی قربانیوں کو یاد رکھنا ہے، میڈیا نے یوم دفاع و شہداء پر

جو مہم چلائی ہے وہ قابل تعریف ہے، شہداء کے اہل خانہ نے آج محسوس کیا ہو گا کہ ہم ان کے احسان مند ہیں، ملک کی بات آئے تو ہم سب ایک ہیں، جس سے آپ کو پیار ہوتا ہے اس کی برائیاں اور کمزوریاں بھول جاتے ہیں۔ انہوں نے کہا کہ آرمی چیف شہیدوں کے گھر جاتے ہیں، پاکستان سے پیار کریں اور متحد رہیں، پاک فوج ہر مشکل مقابلہ کرنے کی صلاحیت رکھتی ہے، قوم اپنی پاک فوج پر یقین رکھے، قوم یقین رکھے کوئی ایسا خطرہ نہیں جس سے پاک فوج نمٹ نہیں سکتی۔