ریاض،اسلام آباد(آن لائن،این این آئی)عازمین حج اور عمرہ معتمرین کو بیماریوں سے بچانے کے لیے مستقبل میں جراثیم کش احرام تیار کرنے کا منصوبہ بنایا گیا ہے۔سعودی میڈیا رپورٹس کے مطابق نینو ٹیکنالوجی کے استعمال کے ذریعے احرام کی تیاری ایک سعودی بزنس مین حمد ال یامی کا آئیڈیا ہے جو پاکستان کے شہر فیصل آباد میں تیار کیے جائیں گے۔مین حمد ال یامی کو یہ آئیڈیا اخبار میں ایک خبر پڑھ کر آیا۔

جس میں بتایا گیا تھا کہ اْم القریٰ یونیورسٹی کی ایک ٹیم نینو ٹیکنالوجی کے استعمال کے ذریعے مسجد الحرام میں بچھے قالینوں پر چاندی کے نینو اجزاء کی تہہ چڑھا رہی ہے جس کی وجہ سے جراثیم کی افزائش نہیں ہوسکتی۔تاہم جراثیم سے بچنے کے لیے چاندی کا استعمال پرانا طریقہ ہے۔ہر سال لاکھوں افراد عمرہ اور حج کے لیے سعودی عرب جاتے ہیں جہاں مختلف بیماریاں پھیلنے کا خطرہ رہتا ہے۔یہ خبر پڑھ کر ال یامی کو نینو ٹیکنالوجی کے تحت احرام کی تیاری کا خیال آیا اور انہوں نے معلومات حاصل کرنا شروع کیں۔ دبئی میں ایک جرمن فیشن ڈیزائنر سے ان کا رابطہ ہوا جس نے انہیں جراثیم سے پاک کش احرام بناکر دیئے جن کی فروخت کا آغاز 2017 میں حج کے دوران پہلی بار ہوا۔انہیں مزید سستا بنانے کے لیے ال یامی نے پاکستان کے شہر فیصل آباد کا رخ کیا جہاں انہیں یہ احرام مزید مناسب قیمت پر بنانے کی پیشکش ہوئی جو انہوں نے قبول کرلی۔گورنر مکہ کی منظوری کے بعد اس منصوبے پر عمل شروع ہوگیا اور 2030 تک تمام عازمین کو جراثیم سے پاک احرام دستیاب ہوں گے۔دوسری جانب حج 2018ء کے دوران جاں بحق افراد کی تعداد 57 ہوگئی ۔ وزارت مذہبی امور کے ترجمان کے مطابق وفات پانے والے 40 پاکستانی عازمین کا تعلق سرکاری سکیم ٗ17 کا تعلق نجی حج سکیم سے ہے۔ مکہ مکرمہ میں 38، مدینہ منورہ میں 7، منیٰ میں 7 اور میدان عرفات میں 4 پاکستانی اللہ کو پیارے ہوئے۔ ترجمان کے مطابق ایک حاجی ٹریفک حادثہ میں جاں بحق ہوا ٗ 56 پاکستانی طبعی اموات کا شکار ہوئے۔ متوفین کو حجاز مقدس کے قبرستانوں میں ان کے ورثاء کی اجازت سے سپرد خاک کر دیا گیا