لاہور(اے این این ) تحریک پاکستان کے کارکن، بزرگ مسلم لیگی، قائد اعظم کے ساتھی سید احمد سعید کرمانی ایڈووکیٹ انتقال کر گئے۔ مرحوم کی عمر 95 سال تھی۔ مرحوم طویل عرصہ سے علیل تھے۔ سابق وزیر ، سفیر اور لاہور ہائی کورٹ بار کے صدر بھی رہے۔ مرحوم سینیٹر ڈاکٹر آصف کرمانی کے والد تھے۔احمد سعید کرمانی کے بیٹے آصف کرمانی نے ایک بیان جاری کیا۔
جس میں انہوں نے اپنے والد کی وفات کے بارے میں آگاہ کیا۔ سینیٹر آصف کرمانی نے اپنے بیان میں بتایا کہ ان کے والد طویل علالت کے بعد 26 اگست کی صبح انتقال کرگئے۔احمد سعید کرمانی مسلم لیگ کے مرکزی رہنما تھے اور بانی پاکستان قائدِ اعظم محمد علی جناح کے معاون بھی تھے۔وہ ایوب خان کے دور میں 7سال تک وفاقی وزیر رہے ۔اس کے علاوہ1970کی دہائی میں مصر میں پاکستان کے سفیر کے طور پر بھی فرائض انجام دئیے ۔وہ اسی دہائی میں لاہور ہائی کورٹ بار کے صدر سمیت کئی اہم عہدوں پر فائز رہے ۔معروف وکیل 1960 کی دہائی میں مسلم لیگ کے صدر کے عہدے پر بھی اپنی خدمات انجام دیں، بعدِ ازاں انہوں نے نواز شریف کی قیادت میں پاکستان مسلم لیگ (ن) میں شمولیت اختیار کرلی تھی۔احمد سعید کرمانی 1957 میں سپریم کورٹ آف پاکستان کے وکیل بنے اور اپنی ریٹائرمنٹ تک یہاں خدمات انجام دیں۔ دریں اثنا ممبر آزاد جموں و کشمیر قانون ساز اسمبلی و سجادہ نشین درگاہ بساہاں شریف پیر علی رضا بخاری اپنا دورہ حویلی مختصر کر کے سید احمد سعید کرمانی کے نماز جنازہ میں شرکت کے لئے لاہور روانہ ہو گئے۔ لاہور روانگی سے قبل اپنی گفتگو میں پیر علی رضا بخاری نے تحریک پاکستان کے عظیم کارکن سید احمد سعید کرمانی ایڈووکیٹ مرحوم کی تحریک پاکستان کے لئے پیش کی گئی قربانیوں کو زبردست خراج پیش کیا اور کہا کہ ان کی رحلت سے پاکستان ایک عظیم محب وطن سے محروم ہو گیا اور ان کی وفات سے پیدا ہونے والا خلا دیر تک پر نہیں ہو سکے گا۔
