رفح (این این آئی)فلسطین کے محصور علاقے غزہ کی پٹی کی واحد بین الاقوامی گزرگاہ رفح کے گزشتہ ایک ہفتے سے مسلسل بند ہونے کے نتیجے میں دونوں طرف پھنسے فلسطینی سخت مشکلات سے دوچار ہیں۔فلسطینی بارڈر امور کے عہدیداروں کا کہنا ہے کہ غزہ کی پٹی کی بین الاقوامی گذرگاہ رفح کو ایک ہفتے سے دو طرفہ ٹریفک کیلئے بند کر دیا گیا ہے۔بیان میں کہا گیا ہے کہ
مصری حکام کی طرف سے ایک ہفتہ پیشتر رفح گزرگاہ کو بند کیا تھا اس کے بعد وجہ بتائے بغیر یہ گذرگاہ مسلسل بند ہے۔فلسطینی بارڈر حکام کا کہنا ہے کہ عید الاضحی کے موقع پر رفح گزرگاہ کی بندش سے غزہ کے محصور فلسطینیوں کی مشکلات میں اضافہ ہوگیا ہے۔ سرحد کے دونوں طرف موجود فلسطینی اور دوسرے شہری اپنے پنے گھروں کو جانے کیلئے پریشان ہیں۔
