لاہور ( این این آئی)اداکار احسن خان اور اداکارہ نیلم منیر نے کہا ہے کہ ہماری فلم ’’ چھپن چھپائی ‘‘ فلم بینوں کو اپنے سحر میں مبتلا کر لے گی ، فلم کی تشہیری مہم کے لئے ہم خصوصی طور پر لاہور آئے ہیں اور یہاں جس قدر محبت کا اظہار کیا گیا ہے اس کو فراموش نہیں کر سکتے ۔
اداکارہ نیلم منیر نے خصوصی گفتگو کرتے ہوئے کہا کہ اس سے قبل میں ٹی وی ڈراموں تک محدود تھی اور بطور فلمی ہیروئن ’’ چھپن چھپائی‘‘ میری پہلی کاوش ہے جس پر ہدایتکار محسن علی نے بھرپور محنت کی ہے ، مجھے قوی یقین ہے کہ ہماری فلم سپر ہٹ ثابت ہو گی ۔ انہوں نے کہا کہ فلم میں احسن خان نے میرے مد مقابل ہیرو کا رول ادا کیا ہے اور ان کی حوصلہ افزائی سے مجھے کام کرنے میں زیادہ مشکلات پیش نہیں آئیں۔
دوسری جانب احسن خان نے کہا کہ فلم چھپن چھپائی اس سال کی ریلیز ہونے والی آخری پاکستانی فلم ہے جس کی کامیابی کے بعد فلمسازی کے رحجان میں اضافہ ہو گا ۔ انہوں نے کہا کہ مجھے بھارت سے بھی فلموں کی پیشکش ہو چکی ہے مگر میری اولین ترجیح پاکستان فلم انڈسٹری ہے اور اسکی بہتری کے لئے میں اپنا کردار ادا کرتا رہوں گا۔
