لاہور ( این این آئی) بولی وڈ اداکار سلمان خان کی فلم ’’ٹائیگر زندہ ہے ‘‘رواں ماہ 22 تاریخ کو دنیا بھر میں ریلیز کی جائے گی البتہ پاکستان میں اس فلم کی ریلیز پر پابندی عائد ہوچکی ہے۔نجی ٹی وی کے مطابق وزرات اطلاعات نے سینسر بورڈ کی سفارش کے بعد فلم ’’ٹائیگر زندہ ہے ‘‘کے لیے این او سی جاری کرنے سے انکار کردیا ہے۔رپورٹ میں بتایا گیا کہ فلم میں پاکستان سے متعلق سینز موجود ہیں، جس کی وجہ سے اسے سینسر بورڈ نے کلیئر
نہیں کیا۔خیال رہے کہ فلم ’’ٹائیگر زندہ ہے ‘‘سلمان خان کی 2012ء میں ریلیز ہوئی فلم ایک تھا ٹائیگر کا سیکوئل ہے۔فلم ایک تھا ٹائیگر کو بھی پاکستان میں پابندی کا سامنا کرنا پڑا تھا، اس فلم میں سلمان خان نے ہندوستانی جبکہ کترینہ کیف نے پاکستانی جاسوس کا کردار ادا کیا۔یہ دونوں اس نئی فلم میں بھی یہی کردار دھراتے نظر آئیں گے۔فلم میں پاکستانی گلوکار عاطف اسلم نے بھی ایک گانا گایا ہے۔
