اسلام آباد (مانیٹرنگ ڈیسک)معروف بالی ووڈ اداکارہ ارمیلا ماٹنڈکر 90کی دہائی میں تیزی سے ابھر کر سامنے آئیں اور اپنی جاندار اداکاری اور رقص سے فلم انڈسٹری میں نمایاں مقام بنا لیا، ارمیلا کی خوبصورتی ، جاندار
اداکاری اور رقص میں خصوصی مہارت نے انہیں جلد ہی صف اول کی ہیروئنوں میں لا کھڑا کیا۔ ارمیلا نہ صرف بھارت بلکہ پاکستان اور دنیا بھر میں اردو ہندی جاننے والے افراد میں یکساں مقبول ہیں۔ 90کی دہائی کے اختتام پر اپنے کیئرئیر کے عروج پر پہنچ چکی تھیںاور پھر اچانک ارمیلا نے شوبز کی سرگرمیوں سے آہستہ آہستہ کنارہ کشی اختیار کرنا شروع کر دی اور اب وہ شوبز کی سرگرمیوں سے خود کو دور ہی رکھتی ہیں۔ ارمیلا نے حال ہی میں ایک ماڈل اور کشمیری بزنس مین محسن اختر سے شادی کی ہے ۔ ارمیلا اور محسن اختر کی شادی کی تقریب میں صرف ان کے دوست اور خاندان کے چند لوگ موجود تھے، ارمیلا نے شوبز شخصیات کو اپنی شادی میں مدعو نہیں کیا تھا۔دونوں کی پہلی ملاقات دسمبر 2014ء میں ایک ڈیزائینر مانیش ملہوترا کی بھتیجی کی شادی میںہوئی اور آہستہ آہستہ کرتے دونوں ایک دوسرے کے قریب آگئے اور زندگی ایک ساتھ گزارنے کا فیصلہ کر لیا۔ ارمیلا نے اپنے ماڈل اور کشمیری بزنس مین شوہر محسن اختر میر کے ساتھ چند خوشگوار لمحات کی تصاویر سوشل میڈیا پر شیئر کی ہیں۔
