اسلام آباد (مانیٹرنگ ڈیسک) ہالی وڈ کے مشہوراداکار جیکی چن نے اپنے چاہنے والوں کو ورطہ حیرت میں ڈال دیا۔ تفصیلات کے مطابق اداکار جیکی چن نے اپنی زندگی کے کئی اہم رازوں سے پردہ اٹھایا۔ انہوں نے بتایا کہ وہ آسٹریلوی شہری ہیں ان کی جائے پیدائش ہانگ کانگ ہے مگر ان کے بچپن کی یادیں آسٹریلیا کے شہر کینبرا سے جڑی ہیں جہاں جیکی چن کے والدین چارلس اور لی لی امریکی سفارتخانے میں ملازم تھے۔

جیکی چن نے بتایا کہ ان کا نام سٹیو ہے وہ جب پڑھائی کے دوران اے ٹی سی ڈکسن کالج میں پڑھتے تھے تو لوگ انہیں سٹیو کے نام سے پکارتے تھے اور کینبرا میں امریکی سفارتخانے میں انہیں لوگ پاؤ جبکہ سفارتخانے کے ڈرائیور نے ان کا نام جیک رکھا ہوا تھا جو بعد میں جیکی میں تبدیل ہو گیا۔ جیکی چن نے بتایا کہ ان کے والد سیکرٹ ایجنٹ تھے جنہوں نے کئی سال جاسوسی کا کام کیا۔ انہوں نے بتایا کہ جب وہ ہانگ کانگ میں تھے تو وہاں سے انہوں نے کنگ فو اور ایروبکس کی ٹریننگ حاصل کی۔ انہوں نے بتایا کہ اس کے بعد وہ پھر آسٹریلیا واپس اپنے والدین کے پاس آ گئے۔ آسٹریلیا واپس آنے کے بعد اداکاری کے شعبے میں جانے کا فیصلہ کیا۔ انہی دنوں میں نے اپنا نام جیک سے جیکی میں بدلا۔ اداکاری کے میدان میں مجھے شروع میں ناکامی کا سامنا کرنا پڑا مگر جب گولڈن ہارویسٹ کمپنی میں کام کرنے کا موقع ملا تو پھر کامیابیوں نے میرے قدم چومے۔انہوں نے کہا کہ کامیابی انہیں کئی ناکامیوں کے بعد ملی اس لئے وہ ناکامی میں کامیابی کو تلاش کرتے کرتے اس مقام تک پہنچے۔