لاہور(این این آئی) ماڈل واداکارہ شین جاوید پیا گھر سدھار گئیں، انکی رخصتی کی تقریب گزشتہ روز مقامی ہوٹل میں ہوئی۔ تقریب میں دولہا اور دلہن کی فیملی کے علاوہ اداکارہ دردانہ رحمن، ماہم رحمن، نادیہ علی اور شوبزسے وابستہ افراد نے شرکت کی۔ شین جاوید کا نکاح چند روز قبل ہو گیا تھا تاہم شادی کی تین روزہ تقریبات خاموشی سے جاری رہیں۔ ذرائع کے مطابق شین جاوید نے ارینج میرج کی ہے اور یہ شادی دونوں کے والدین
کی پسند سے ہوئی ہے۔ شین کے شوہر پیشے کے اعتبار سے سول انجینئر ہیں، جنکی ذاتی کنسٹرکشن کمپنی بھی ہے۔ ان کے شوہر کا تعلق ایک سیاسی جماعت سے ہے جبکہ وہ ایک سابق وزیر اعظم کے بھی قریبی ساتھی ہیں۔ اداکارہ کو ان کے شوہر نے گارڈن ٹاؤن میں ایک کنال کا گھر گفٹ کیا ہے۔ شین نے میڈیا سے گفتگو کرتے ہوئے کہا کہ شادی سے میرے کیریئر پر کوئی فرق نہیں پڑے گا۔
