ممبئی (مانیٹرنگ ڈیسک) معروف پاکستانی اداکارہ صبا قمر نے بالی ووڈ کے دروازے اپنے لئے ہمیشہ ہمیشہ کے لئے بند کر لئے ہیں کیونکہ بھارتی فلم انڈسٹری کے ”دبنگ خان “ کی ”دادا گیری“ بالی ووڈ میں خوب چلتی ہے اور ان کو مذاق میں بھی اپنی ”توہین“ پسند نہیں۔یہ دعویٰ بھارتی نجی چینل ”انڈیا ٹی وی “ نے اپنے ایک پروگرام میں کیا

جس میں اداکارہ نور کی میزبانی میں چلنے والے پاکستانی نجی چینل کے مشہور مارننگ شو کا ایک کلپ دکھایا گیا جس میں صبا قمر بطور مہمان شامل ہوئیں , میزبان کے سوال کہ اگر انہیں سلمان خان کے ساتھ ”دبنگ 3“ کی آفر کی گئی تو وہ کس بنیاد اور کس طرح اس آفر کو ری جیکٹ کریں گی؟ جس پر صبا قمر کا کہنا تھا کہ سلمان بہت چھچھورے ہیں اور انہیں رقص کرنا بھی نہیں آتا، وہ صرف کچھ ہی سٹیپ کرتے ہیں۔صبا قمر کے اس جواب پر سیخ پا ہوتے ”انڈیا ٹی وی “ کا کہنا تھا کہ سلمان خان بالی وڈ کے سب سے مشہور اداکار ہیں، ان کے ساتھ سکرین شیئرنگ کا خواب ہر کسی کا ہوتا ہے، سلمان جس کے ساتھ کام کر لیں یا جس کی تعریف بھی کردیں وہ راتوں رات مشہور ہو جاتا ہے، کم عمر کی انوشکا شرما ہو یا بڑی عمر کی ریکھا، سلمان خان کے ساتھ فلم اور ٹی وی میں کام کرنا ہر فلمی ہیروین کی خواہش سمجھی جاتی ہے ، جبکہ سلمان کی فین فالونگ صرف انڈیا میں ہی نہیں بلکہ دنیا بھر میں ہے، ایسے میں جہاں ہر کوئی ان کے ساتھ کام کرنے کے لئے ترس رہا ہے وہیں دوسری طرف ایک پاکستانی اداکارہ صبا قمر نے سلمان خان کے ساتھ کام کرنے سے انکار کر دیا ہے،لیکن وہ یہ بھول گئی ہیں کہ دبنگ کی داداگیری بالی ووڈ میں خوب چلتی ہے،انہیں تو ایسا مذاق بھی نہیں پسند، ایسے میں صبا قمرنے یہ کہہ کر ایک طرح سے اپنے بالی ووڈ خواب کو ختم ہی کر دیا ہے۔