اسلام آباد (مانیٹرنگ ڈیسک) صوابی کے علاقے پنجپیر بائی پاس کے مقام پر نامعلوم افراد کی فائرنگ سے مقامی گلوکار درویش جاں بحق ہوگئے ہیں۔تفصیلات کے مطابق پولیس کا کہنا ہے کہ مانیری کے رہائشی لوک گلوکار 62 سالہ درویش خان قریبی گاوں پن پیر سے پرفارمنس دے کا واپس آرہے تھے کہ پنجپیر بائی پاس کے مقام پر نامعلوم افراد نے ان کی کار پر فائرنگ کردی اور وہ موقع پر ہی جاں بحق ہوگئے۔
پولیس کے مطابق درویش کو چھ گولیاں لگیں جس کے بعد وہ کافی دیر تک واقعہ کی جگہ پر پڑے رہے۔ اگلی صبح پولیس اطلاع ملنے پر موقع واردات پر پہنچی اور درویش خان کی لاش کو پوسٹ مارٹم کے لیے اسپتال پہنچایا۔ابتدائی رپورٹ کے مطابق یہ ٹارگٹ کلنگ کا واقعہ تھا جبکہ حکام نے تمام آرٹسٹس کو سیکورٹی صورت حال کی خرابی کی وجہ سے محتاط ہونے کی ہدایت کر رکھی ہے۔واضح رہے کہ دو روز قبل اسٹیج اداکارہ قسمت بیگ کو لاہور میں قتل کردیا گیا تھا۔ قسمت بیگ کو لاہور میں گیارہ گولیاں ماریں گئیں جس کےبعد انہیں اسپتال لے جایا گیا تاہم وہ جانبرنہ ہوسکیں۔