اسلام آباد (نیوز ڈیسک) جس دن پاکستانی دھرتی پر قدم رکھوں گا وہ دن میری زندگی کا بہت بڑا دن ہو گا۔ ان خیالات کا اظہار بالی وڈ کے معروف اداکار انیل کپور نے ایک برطانوی نشریاتی ادارے سے گفتگو کرتے ہوئے کیا۔ انہوں نے کہا کہ ان کی دلی خواہش ہے کہ وہ پاکستان جائیں اور جس دن وہ پاکستانی سرزمین پر قدم رکھیں گے وہ دن ان کے لیے بہت بڑا دن ہو گا۔اپنے انٹرویو میں انیل کپور کا کہنا تھا کہ ’میں ترس رہا ہوں وہاں پہنچنے کے لیے، جانے کے لیے، کیونکہ وہاں میرے پتا جی میرے دادا جی میری پیڑیوں کا وہاں جنم ہوا تھا۔‘انیل کپور کے آباؤاجداد کا تعلق پاکستان کے صوبہ خیبر پختونخوا کے دارالحکومت پشاور سے تھا اور ان کے والد سریندر کپور 1925 میں پشاور میں پیدا ہوئے تھے۔انیل کا کہنا تھا کہ وہ چاہیں گے کہ جہاں سے ان کی شروعات ہوئی وہ وہاں جائیں اور وہ بہت جلد پاکستان میں ہوں گے۔ایک سوال کے جواب میں انہوں نے کہا کہ پاکستان اور بھارت کے درمیان تعلقات بہتر کرنے کے لیے دونوں ممالک کے فنکار کیا کردار ادا کر سکتے ہیں؟ انیل کپور کا کہنا تھا کہ تشدد سے کچھ حاصل نہیں ہو گا۔ان کا کہنا تھا کہ ’جتنے لوگوں کو میں ملا ہوں پاکستان اور انڈیا سے، وہ تو چاہتے ہیں کہ دوستی ہو، تجارت ہو کیونکہ جتنا بزنس ہو گا اتنا ہی دونوں ملکوں کو اس کا فائدہ ہے۔‘انھوں نے کہا کہ ’ایک ہی تو لوگ ہیں ہم، پہننے کا، کھانے کا، پینے کا، بات کرنے کا، سب طریقے ایک ہی ہیں، کوئی الگ چیز ہے ہی نہیں ہم میں تو کیوں الگ رہ رہے ہیں ہم لوگ؟‘ان کا کہنا تھا کہ کہیں نہ کہیں ڈائیلاگ اور بات چیت ہونی چاہیے، اور انھیں امید ہے اور وہ مثبت سوچ رکھتے ہیں کہ کبھی نہ کبھی یہ ضرور ہوگا۔