ممبئی (مانیٹرنگ ڈیسک) بالی ووڈ کے سپر سٹار سنجو بابا کے مداحوں کیلئے بری خبر ہے کہ ان کی اہلیہ مائنتہ نے سماجی رابطوں کی ویب سائٹس پر ایسی تصاویر اپ لوڈ کی ہیں جس سے ان کے شوہر کو دوبارہ جیل ہو سکتی ہے۔ خیال رہے کہ سنجے دت غیر قانونی اسلحہ کیس میں کئی ماہ جیل کی ہوا کھا چکے ہیں۔ ان کے اچھے برتاؤ کی وجہ سے انھیں رواں سال 25 فروری کو جیل سے رہا کر دیا گیا تھا۔ تاہم اب ایسا لگ رہا ہے کہ ان کی اہلیہ مائنتہ کی ایک چھوٹی سی غلطی انھیں دوبارہ جیل بھیجنے کا سبب بن سکتی ہے۔
ہوا یوں کہ مائنتہ دت نے حال ہی میں سوشل میڈیا ویب سائٹ انسٹاگرام پر اپنی کچھ تصاویر اپ لوڈ کی ہیں۔ ان تصاویر میں بظاہر کوئی خرابی نظر نہیں آ رہی لیکن اگر ان کا غور سے جائزہ لیا جائے تو آپ دیکھ کر حیران رہ جائیں گے کہ ان تصاویر میں ان کے نزدیک پڑے لیمپ کو ایک رائفل سے بنایا گیا ہے۔ ان تصاویر کے اپ لوڈ ہوتے ہی سوشل میڈیا پر بحث چھڑ گئی ہے اور سنجو بابا کے مداح شدید پریشان ہیں کہ ان کی اہلیہ کی اس بیوقوفانہ حرکت سے کہیں انھیں دوبارہ جیل نہ ہو جائے۔
واضح رہے کہ غیر قانونی اسلحہ رکھنے کے الزام میں سنجے دت کو پانچ سال قید کی سزا ہوئی تھی۔ اگر ان تصاویر کو بنیاد پر بنا کر ان کیخلاف انکوائری شروع ہو گئی اور اس میں ثابت ہو گیا کہ یہ لیمپ واقعی کسی رائفل سے بنا ہے تو سنجے دت دوبارہ مشکل میں پھنس سکتے ہیں۔