ممبئی (مانیٹرنگ ڈیسک)بالی ووڈ اداکارہ کنگنا رناوٹ کا کہنا ہے کہ سنیما کا مستقبل شارٹ فلمیں ہیں جنہیں انٹرنیٹ پر بیحد پزیرائی موصول ہوتی ہے۔شارٹ فلم ’کریتی‘ کی لانچ تقریب کے دوران کنگنا نے شارٹ فلموں کے فارمیٹ کی خوب تعریف کی، ان کا کہنا تھا کہ انٹرنیٹ پر نشر ہونے والے یہ فلمیں بہت جلد سب سے زیادہ ہٹ بن جائیں گی۔کنگنا کا کہنا تھا کہ ’صرف میں ہی نہیں میرے خیال سے پوری دنیا کا یہ ماننا ہے کہ سنیما کا مستقبل انٹرنیٹ پر نشر کی جانے والی شارٹ فلمیں ہیں کیوں کہ دو سے تین گھنٹے تک چلنے والی فلمیں مستقبل نہیں ہوسکتیں، یہ آن لائن کا زمانہ ہے،جتنا جلدی ہمیں اس بات کا احساس ہوجائے اتنا اچھا ہے، اس سے ہم دنیا سے پیچھے نہیں رہیں گے۔کنگنا نے خود بھی کسی شارٹ فلم میں جلوہ گر ہونے کی خواہش کا اظہار کیا، ان کا کہنا تھا ’میں شارٹ فلم میں کام کرنے کے لیے بیتاب ہوں،
یہ ان کے لیے کافی مشکل اور نیا ہوگا جو اتنی طویل فلموں کا حصہ رہے ہیں۔18 منٹ دورانیہ کی شارٹ فلم ’کریتی‘ کی کہانی ایک کردار کے پیچیدہ ذہن کے گرد گھومتی ہے۔کنگنا سے جب رپورٹرز نے پوچھا کہ کیا انہیں کسی قسم کا خوف ہے تو ان کا کہنا تھا ’مجھے سانپوں کا خوف ہے، مجھے سانپ سے حد سے زیادہ ڈر لگتا ہے، میں نے خود سے وعدہ کیا تھا کہ کسی کو نہیں بتاؤں گی کیوں کہ انڈسٹری میں موجود آپ کے دوست اور ساتھی اداکار اس بات کو جاننے کی کوشش کرتے رہتے ہیں کہ آپ کو کس چیز کا خوف ہے اور پھر آپ کو اس سے ڈراتے ہیں۔اگر بولی وڈ فلموں کی بات کی جائے تو کنگنا رناوٹ اس وقت اپنی فلم ’رنگون‘ کی شوٹنگ میں مصروف ہیں جس میں ان کے ہمراہ شاہد کپور اور سیف علی خان اہم کردار ادا کریں گے۔فلم’ ’رنگون‘‘ رواں سال اکتوبر میں سنیما گھروں میں نمائش کے لیے پیش کی جائے گی۔