لاہور (نیوز ڈیسک) ایڈیشنل سیشن جج اعجاز بٹ نے اداکارہ عائشہ ثناءکی جانب سے دائر قذف کے مقدمے کی سماعت 8اپریل تک ملتوی کرتے ہوئے ان کے سابق شوہر مرزا یوسف بیگ کو فرد جرم عائد کرنے کے لئے طلب کر لیا ۔ قبل ازیں عدالت نے اداکارہ کے شوہر یوسف بیگ مرزا کی جانب سے قذف کے مقدمے کی کارروائی روکنے کے لئے دائر درخواست پرفریقین کے دلائل مکمل ہونے پر فیصلہ محفوظ کر لیا ۔اداکارہ کی جانب سے ایڈوکیٹ یاسر مسعود نے پیش ہو کر موقف اختیار کیا کہ عائشہ ثناءکی مرزا یوسف بیگ سے شادی کے بعد 19نومبر 2011کو بیٹا پیدا ہوا۔ لیکن باہمی اختلافات کے باعث دونوں میاں بیوی میں طلاق ہو گئی۔ لیکن بعد ازاں مرزا یوسف بیگ نے اپنے بیٹے محمد مصطفی کی ولدیت سے انکار کرتے ہوئے اس پر بدچلنی کا الزام عائد کر دیا۔ڈی این اے ٹیسٹ کے مطابق بھی مرزا یوسف بیگ بچے کے والد ثابت ہوئے ۔لہٰذاعدالت مرزا یوسف بیگ کے خلاف بدچلنی کا جھوٹا الزام عائد کرنے پر قذف کی کاروائی عمل میں لائے ۔