اسلام آباد (نیوز ڈیسک)ہڑپہ میں 16ویں صدی کی ایک قدیم سرائے کے آثار دریافت کر لیے گئے ہیں۔سیکرٹری آرکیالوجی پنجاب ڈاکٹر احسان بھٹہ کا کہنا ہے کہ اس دریافت نے برصغیر کے پرانے ڈاک نظام اور مسافروں کی رہائش سے متعلق اہم معلومات فراہم کی ہیں۔انہوں نے بتایا کہ کھدائی کے دوران سرائے کے ساتھ آرام کے مقامات اور پانی کا ایک تالاب بھی ملا ہے، جبکہ جگہ جگہ سے مختلف نوادرات بھی برآمد ہوئے ہیں۔

برآمد شدہ نوادرات میں مٹی سے بنی چھوٹی مورتیاں، کھلونوں کی گاڑیاں اور چوڑیوں کے ٹکڑے شامل ہیں، جو اس وقت کی روزمرہ زندگی اور تہذیب کی جھلک دکھاتے ہیں۔ڈاکٹر احسان بھٹہ کے مطابق حکومت پنجاب نے صوبے کے چار بڑے تاریخی مقامات پر کھدائی کے لیے 800 ملین روپے مختص کیے ہیں۔ان کا کہنا تھا کہ ہڑپہ سے ملنے والی یہ نئی دریافت شیر شاہ سوری کے دور کے ڈاک اور سفر کے نظام کو سمجھنے میں مددگار ثابت ہوگی، جبکہ اس سے خطے کی ہزاروں سال پرانی تہذیب کو مزید اجاگر کرنے کا موقع بھی ملے گا۔