کراچی(این این آئی)پی ٹی سی ایل گروپ (یوفون)نے پاکستان میں ٹیلی کام کمپنی ٹیلی نار کے 100 فیصد حصص کی خریداری کا اعلان کردیا ہے۔فروخت کا عمل 2024 میں مکمل ہوگا جو ضوابط کی منظوری سے مشروط ہے۔پی ٹی سی ایل کے اعلامیہ کے مطابق ٹیلی نار پاکستان کے 100 فیصد حصص کی خریداری کا معاہدہ طے پاگیا ہے۔ 100 فیصد حصص کی خریداری 108 ارب روپے میں ہوگی ۔
پی ٹی سی ایل اور پی ٹی ایم ایل کے صدر اور گروپ سی ای او حاتم بامطرف نے کہا، ہمیں یقین ہے کہ ٹیلی نار پاکستان کے ساتھ مل کر جو اسٹریٹجک ہم آہنگی پیدا کی گئی ہے، اس کے نتیجے میں ہمارے صارفین اور اسٹیک ہولڈرز کے لیے قدر میں اضافہ ہوگا کیونکہ وہ اس لین دین کے حتمی مستفید ہیں۔ای اینڈ کے گروپ سی ای او حاتم ڈویدار نے کہا، ٹیلی نار پاکستان کا اسٹریٹجک حصول مارکیٹ کے استحکام کا ایک اہم موقع پیش کرتا ہے، جو ہمیں پاکستان میں اگلی نسل کا بہترین نیٹ ورک بنانے کے لیے مزید سرمایہ کاری کرنے کے لیے بااختیار بناتا ہے۔پی ٹی سی ایل بورڈ کے چیئرمین حسن ناصر جامی نے کہا، پی ٹی سی ایل گروپ نے پاکستان کے لوگوں کو جوڑنے میں اہم کردار ادا کیا ہے۔
