اسلام آباد (این این آئی)پاکستان میں 9ماہ کے دوران ایک کروڑ 30لاکھ موبائل فونز تیارکئے گئے۔ تفصیلات کے مطابق مقامی مینوفیکچرنگ پلانٹس نے 2023کے پہلے نو ماہ (جنوری تا ستمبر)کے دوران ایک کروڑ 30لاکھ موبائل ہینڈ سیٹ تیار کئے ہیں جبکہ تجارتی طور پر ایک کروڑ 9لاکھ موبائل ہینڈ سیٹ درآمد کیے گئے ہیں۔مقامی مینوفیکچرنگ پلانٹس نے سال 2022کے دوران 21.94ملین موبائل ہینڈ سیٹ تیار /اسمبل کئے جبکہ 2021میں یہ تعداد 24.66ملین تھی یعنی اس میں کمی درج کی گئی جس کی وجہ لیٹر آف کریڈٹ (ایل سی) کھولنے پر پابندی کی وجہ سے درآمدات میں مسائل ہیں

۔پاکستان ٹیلی کمیونیکیشن اتھارٹی کے اعداد و شمار کے مطابق سال 2022کے دوران تقریبا 21.94ملین موبائل ہینڈ سیٹ اسمبل کئے گئے جبکہ کمرشل طور پر درآمد کیے گئے فونز کی تعداد 1.53ملین تھی۔مقامی طور پر تیار کردہ /اسمبل ہونیوالے 13.02ملین موبائل فون ہینڈ سیٹوں میں 9.01ملین 2جی اور 4.02ملین سمارٹ فونز شامل ہیں،اس کے علاوہ پی ٹی اے کے اعداد و شمار کے مطابق 57فیصد موبائل ڈیوائسز سمارٹ فونز ہیں جبکہ 43فیصد پاکستان نیٹ ورک پر 2جی ہیں۔