ٹوکیو(نیوز ڈیسک) ایک تحقیق میں یہ بات سامنے آئی ہے کہ موبائل فونز کے بہت زیادہ استعمال سے ہاتھوں پر موجود جراثیم کی بڑی تعداد ان پر منتقل ہو جاتی ہے۔ غیر ملکی خبر رساں ادارے کے مطابق ایک جاپانی کمپنی نے ایسا سمارٹ فون تیار کر لیا ہے جسے صابن اور پانی سے دھویا جا سکتا ہے۔ ڈگنو ریفری نامی یہ فون اپنی طرف کا پہلا سمارٹ فون ہے جسے دھونے سے کوئی نقصان نہیں پہنچتا۔ اس نئے واٹر پروف موبائل فون کو بنانے کا مقصد ان والدین کی پریشانی کو دور کرنا ہے جو اپنے موبائل فون کو صاف رکھنا چاہتے ہیں۔
اس موبائل فون کی تشہیر کیلئے بنائی گئی ایک ویڈیو میں دکھایا گیا ہے کہ ایک بچے کے ہاتھ سے فون ٹماٹو کیچپ سے بھری پلیٹ میں گر جاتا ہے جس کے بعد اس کی والدہ اس فون کو اٹھا کر دھو دیتی ہے۔ کمپنی نے دعویٰ کیا ہے کہ اپنی طرز کا یہ پہلا سمارٹ فون ہے جو مارکیٹ میں سامنے لایا گیا ہے۔ اس فون کو مارکیٹ میں لانے سے پہلے 700 مرتبہ پانی اور صابن سے دھویا گیا لیکن اس کی باڈی اور اندرونی پارٹس کو کوئی فرق نہیں پڑا اور وہ بالکل صحیح سلامت رہے۔
