اسلام آباد(نیو ز ڈیسک )آزاد کشمیر کے اہم شہر میرپور سے تعلق رکھنے والے باصلاحیت طلبا نے ‘میگسٹا’ نامی ماحول دوست گاڑی تیار کی ہے جو ایک لیٹر پیٹرول میں 33 کلو میٹر تک چلنے کی صلاحیت رکھتی ہے۔نجی ٹی وی ڈان نیوز کی رپورٹ کے مطابق ‘میگسٹا’ گاڑی کی تقریب رونمائی میرپور یونیورسٹی آف سائنس اینڈ ٹیکنالوجی میں کی گئی۔ رپورٹ میں بتایا گیا کہ یہ گاڑی شعبہ مکینکل انجینئرنگ کے آٹھ طلبا نے چھ ماہ کی محنت کے بعد تیار کی جو ایک لیٹر میں 33 کلو میٹر تک کا فاصلہ طے کرسکتی ہے۔گاڑی کو پیڑول کے ساتھ ساتھ بیٹری پر بھی چلایا جاسکتا ہے جبکہ اسے نہ صرف بجلی سے چارج کیا جاسکتا ہے بلکہ چلتے ہوئے ا±س کا پنکھا بھی بیٹری چارج کرتا رہتا ہے۔رپورٹ کے مطابق گاڑی میں سولر سسٹم بھی موجود ہے جو پیٹرول نہ ہونے کی صورت میں بیٹری چارج کرتا ہے۔مسٹ یونیورسٹی میں تجرباتی طور پر اس گاڑی کو چارج کرنے کے لیے ایک سولر پینل بھی لگایا گیا ہے۔وائس چانسلر مسٹ یونیورسٹی نے طلبائ اور اساتذہ کو اس کامیاب پروجیکٹ پر مبارک باد دی۔پاکستان میں اس طرح کی کارناموں کی تاریخ کسی سے ڈھکی چھپی نہیں۔اس سے قبل رواں سال جنوری میں ڈان اخبار کی ایک رپورٹ میں ساہیوال کے طلبا اور اساتذہ نے ماحول دوست ایرو ڈائنیمک گاڑی بنائی تھی۔ماحول دوست اس سواری کی تیاری میں ساہیوال کی کامسیٹس یونیورسٹی کے میکینیکل انجینئرنگ ڈپارٹمنٹ کے طلبہ اور اساتذہ نے مشترکہ طور پر کام کیا تھا جبکہ یہ پانچ ماہ کی محنت کے بعد بنائی گئی تھی۔اس کے علاوہ پشاور کے ایک رہائشی نے گاڑی کے انجن سے چلنے والا ایک ہیلی کاپٹر بھی بنایا تھا۔