اسلام آباد(نیوز ڈیسک )سماجی رابطے کی ویب سائیٹ فیس بک کی انتظامیہ ایسی نئی ٹیکنالوجی پر کام کررہی ہے جس کے ذریعے نابینا افراد بھی تصاویر اور پوسٹ کے بارے میں بہت کچھ جان سکیں گے یعنی کسی تصویر کو بیانیہ انداز میں دیکھ سکیں گے۔اگرچہ نابینا حضرات اسکرین ریڈرز کی مدد سے ظاہر ہونے والے ٹیکسٹ کو سن سکتے ہیں ؛لیکن فیس بک پر ذیادہ تر تصاویر شیئر کی جاتی ہیں اور اس نئی ٹیکنالوجی کے ذریعے بصارت سے محروم افراد تصویر کو ’دیکھ ‘ سکیں گے۔ فیس بک کی ایسیسبلٹی ٹیم کے سربراہ جیف وائیلینڈ کے مطابق اس وقت فیس بک کے صارفین کی تعداد ایک ارب سے تجاوز کرچکی ہے لیکن اب کوشش کی جارہی ہے کہ نابینا حضرات بھی کسی طرح فیس بک تصاویر سے استفادہ کرسکیں اور اس کے لیے ایپ پر کام جاری ہے۔ فیس بک میں کام کرنے والے نابینا انجینیئر میٹ کنگ کے مطابق بہت سے نابینا افراد یہ جاننے سے قاصر رہتے ہیں کہ تصویرمیں درحقیقت کس شے کو دکھایا گیا ہے۔توقع ہے کہ اس ایپ کے ذریعے تصویر میں موجود اہم چیزوں کے نام لکھے نظر آئیں گے مثلاً عمارت، درخت یا قدرتی منظر وغیرہ۔ کوشش کی جائے گی کہ بصارت سے محروم افراد کسی تصویر میں 50 فیصد تفصیلات سے آگاہ ہوجائیں تاہم فیس بک نے اس کی بہت تفصیلات بیان نہیں کی ہے۔