اسلام آباد (نیوز ڈیسک) سپریم کورٹ کے 2019 کے فیصلے کے بعد متنازعہ ون کانسٹی ٹیوشن ایونیو منصوبے کی مالیت میں خاطر خواہ اضافہ دیکھنے میں آیا،
جس کے نتیجے میں تقریباً 70 نئے سرمایہ کار اس منصوبے کا حصہ بنے۔ ذرائع کے مطابق عمران خان بھی ان سرمایہ کاروں میں شامل تھے، تاہم انہوں نے اپنا اپارٹمنٹ 2022 میں فروخت کر دیا تھا، جو اب شاہد نصیر کے نام پر رجسٹرڈ ہے۔
رپورٹس کے مطابق اس عمارت میں کئی اہم شخصیات کے اپارٹمنٹس موجود ہیں، جن میں جام کمال خان، اشرف وتھرا، ابصار عالم، ناصر الملک، افتخار حسین چوہدری، محمد آصف سندیلہ، سلمان بشیر، فریال گوہر، احسان مانی، کشمالہ طارق، نسیم زہرہ اور دیگر نمایاں افراد شامل ہیں۔
گزشتہ دنوں کیپیٹل ڈویلپمنٹ اتھارٹی نے پولیس کے تعاون سے عمارت کو خالی کرانے کی کارروائی شروع کی، جو اسلام آباد ہائی کورٹ کے فیصلے کے بعد کی گئی۔ عدالت نے سی ڈی اے کے اس فیصلے کو برقرار رکھا تھا جس میں پلاٹ کی لیز منسوخ کی گئی تھی، کیونکہ یہ زمین اصل میں فائیو اسٹار ہوٹل کی تعمیر کے لیے مختص تھی، تاہم بعد میں قواعد کی خلاف ورزی کرتے ہوئے اسے رہائشی اپارٹمنٹس میں تبدیل کر دیا گیا۔
تاہم اس کارروائی کے بعد شہباز شریف نے مداخلت کرتے ہوئے آپریشن روکنے کی ہدایت جاری کی اور معاملے کا جائزہ لینے کے لیے ایک کمیٹی تشکیل دے دی۔ حکومت کا کہنا ہے کہ حتمی فیصلہ کمیٹی کی سفارشات کی روشنی میں کیا جائے گا۔
