لاہور(این این آئی)پنجاب میں رمضان پیکیج پر اضافی رقم لینے والوں کے خلاف کارروائی میں3 ملزمان کو گرفتار کرلیا گیا۔تفصیلات کے مطابق قصور، بھکر اور گجرانوالہ میں رمضان پیکیج پراضافی رقم لینے والوں کے خلاف کارروائی کرتے ہوئے 3 ملزمان کو گرفتارکر لیا گیا۔ غیرقانونی دھندے میں ملوث ایجنٹس بلیک لسٹ کر دئیے گئے۔قصور میں 10 ہزار روپے رمضان پیکیج کی رقم پر پانچ سو روپے غیرقانونی طور پر لینے والے ملزم بلال کو گرفتارکیا گیا۔

پولیس نے مکہ موبائل شاپ اور بھکر میں ایلفا ریٹیلر سیل کرکے ملزمان کے خلاف مقدمات درج کرلیے اور مشینیں بھی تحویل میں لے لیں۔ پنجاب حکومت نے مستحقین کو قطار سے بچانے کیلئے اس بار نقد رقوم ڈیجیٹل ٹیکنالوجی سے فراہم کی تھیں۔وزیراعلیٰ پنجاب مریم نواز نے واقعے کا سخت نوٹس لیتے ہوئے پولیس اور انتظامیہ کو سرچ آپریشن کرنے کی ہدایت کی تھی۔ مریم نواز کا کہنا تھا کہ نادار غریبوں سے رقم وصول کرنے والے کسی رعایت کے مستحق نہیں، رمضان پیکیج حاصل کرنے والے اپنی شکایات فوری طور پر درج کروائیں۔شہری رمضان پیکیج سے متعلق شکایات 080002345 پر مفت کال کرکے درج کروا سکتے ہیں۔